جاڭالىقتار
قازاقستاندىقتاردىڭ اۆتونەسيە مەن يپوتەكا الۋى ازايدى
مامىر ايىندا قازاقستاندىقتار ءبىر اي بۇرىنعىدان يپوتەكالىق نەسيەنى 16 پايىزعا از راسىمدەدى. اۆتونەسيەگە سۇرانىس تا 10 پايىزعا تومەندەدى. مۇنداي قۇبىلىس نەسيەلەۋدىڭ باسقا سالالارىندا دا بايقالادى,-دەپ حابارلايدى Qandastar.kz
قازاقستاندا جەكە تۇلعالاردى نەسيەلەۋ نارىعى سالقىنداۋدا, Data Hub Telegram-ارناسىنىڭ ساراپشىلارى اتاپ وتكەندەي, اعىمداعى جىلدىڭ مامىر ايىندا قارىزدارعا سۇرانىستىڭ تومەندەۋى بايقالادى.
وسىلايشا, ءبىر ايدا قازاقستاندا 8,5 مىڭ يپوتەكا بەرىلدى – بۇل الدىڭعى ايمەن سالىستىرعاندا بىردەن 16 پايىزعا از. نەسيەلەردىڭ جالپى سوماسى 129,4 ملرد تەڭگە بولدى, بۇل 14 پايىزعا از. بارلىعى 1 ماۋسىمداعى جاعداي بويىنشا 558 مىڭ قازاقستاندىق يپوتەكا الدى – ولاردىڭ جالپى قارىزى شامامەن 6 ترلن تەڭگە بولدى.
اۆتوكولىك نەسيەلەرى سالاسىندا دا وسىنداي جاعداي بايقالادى. مامىر ايىندا نەسيە بەرۋ سوماسى 7 پايىزعا, ال قارىزدار سانى 10 پايىزعا قىسقاردى. سانمەن كورسەتسەك, بۇل 111,8 ملرد تەڭگە جانە 14,5 مىڭ نەسيە. بۇل – 2023 جىلدىڭ ناۋرىزى مەن اقپانىنان باستاپ مينيمۋم كورسەتكىش. ايتا كەتۋ كەرەك, اۆتوكولىك نەسيەلەرىنە سۇرانىس ەكىنشى اي قاتارىنان تومەندەپ كەلەدى.
تۇتىنۋشىلىق كەپىلسىز نەسيەلەرگە كەلەتىن بولساق, مۇندا ءارتۇرلى ديناميكا بايقالادى. نەسيەلەر سانى 4 پايىزعا ازايىپ, 2,9 ملن-عا جەتتى. ال ەميسسيا كولەمى 4 پايىزعا ءوسىپ, 855,5 ملرد تەڭگەگە جەتتى. ورتا ەسەپپەن ءاربىر قارىز الۋشى 290,9 مىڭ تەڭگەگە نەسيە راسىمدەسە, بەرىلگەن نەسيەنىڭ ماكسيمالدى سوماسى 98 ميلليون تەڭگەگە جەتتى.
45 كۇنگە دەيىنگى مەرزىمگە جانە 50 اەك-تەن اسپايتىن سوماعا بەرىلەتىن «جالاقىعا دەيىنگى نەسيەلەر» (PDL) مامىردا نەبارى 49,8 ملرد تەڭگە بولدى. ساراپشىلاردىڭ پىكىرىنشە, بۇل – 2023 جىلدىڭ قاڭتارىنان بەرگى ەڭ ناشار كورسەتكىش.
جالپى, قاراپايىم قازاقستاندىقتاردىڭ 2024 جىلعى 1 ماۋسىمداعى جاعداي بويىنشا بانكتەرگە قارىزى شامامەن 21 ترلن تەڭگە بولدى – بۇل ءبىر اي بۇرىنعى كورسەتكىشتەن 1,3 پايىزعا ارتىق. مامىر ايىندا بەرىلگەن نەسيەنىڭ جالپى سوماسى 1,2 ترلن تەڭگەگە جەتتى.
