قازاقستاندىقتاردىڭ نەسيەسى 18 ترلن تەڭگەگە جەتتى

ونىڭ ىشىندە 716 ملرد تەڭگە نەسيەنى تولەي الماي ءجۇر, دەپ حابارلايدى qandastar.kz قارجى مونيتورينگى اگەنتتىگىنە سىلتەمە جاساپ.

بيىلعى 1 ماۋسىمداعى اقپاراتقا سۇيەنسەك, ەلىمىزدە ەكىنشى دەڭگەيلى 21 بانك جۇمىس ىستەيدى. ونىڭ 11-ءى شەتەلدىڭ قاتىسۋىمەن, ال 8-ءى ەنشىلەس بانك.

بانك سەكتورىنىڭ اكتيۆتەرى نەگىزىنەن ءوتىمدى اكتيۆتەردىڭ 3%-عا نەمەسە 598 ملرد تەڭگەگە ءوسۋى ەسەبىنەن مامىردا 1,6%-عا نەمەسە 853 ملرد تەڭگەگە ۇلعايىپ (2024 جىلدىڭ باسىنان بەرى 3,5%-عا نەمەسە 1,8 ترلن تەڭگەگە ءوسۋ), 53,3 ترلن تەڭگەنى قۇراعان.

– ەكىنشى دەڭگەيدەگى بانكتەردىڭ وتىمدىلىگى جوعارى اكتيۆتەرى 15,8 ترلن تەڭگەنى نەمەسە اكتيۆتەردىڭ 29,6%-ىن قۇرادى, بۇل بانكتەرگە مىندەتتەمەلەرىنە تولىق كولەمدە قىزمەت كورسەتۋگە مۇمكىندىك بەرەدى. 2024 جىلدىڭ مامىرىندا ەكىنشى دەڭگەيدەگى بانكتەر ەكونوميكاعا بەرگەن كرەديتتەر 1,4%-عا 29,5 ترلن تەڭگەگە دەيىن (2024 جىلدىڭ باسىنان بەرى 5,6%-عا ءوسۋ), ونىڭ ىشىندە ۇلتتىق ۆاليۋتادا 1,4%-عا 27,2 ترلن تەڭگەگە دەيىن, شەتەل ۆاليۋتاسىندا 1,8%-عا 2,4 ترلن تەڭگەگە دەيىن ۇلعايدى. ناتيجەسىندە تەڭگەدەگى كرەديتتەردىڭ ۇلەس سالماعى 2024 جىلعى 1 ماۋسىمداعى جاعداي بويىنشا 92,0%-دى قۇرادى,– دەلىنگەن حابارلامادا.