قازاقستاندىقتاردىڭ جەكە دەرەگى تاراپ كەتكەن: توقاەۆ ۇلتتىق مەسسەندجەرگە كوشۋدى تاپسىردى

فوتو: اقوردا

پرەزيدەنت قاسىم-جومارت توقاەۆ جاساندى ينتەللەكت دامۋىنا بايلانىستى جاڭا قاۋىپتەر پايدا بولعانىن ايتىپ, دەرەكتەردى باسقارۋ مەن كيبەرقاۋىپسىزدىكتى كۇشەيتۋ قاجەت ەكەنىن مالىمدەدى, دەپ جازدى qandastar.kz

بۇل تۋرالى Stan.kz اقپارات اگەنتتىگى حابارلايدى.

قاسىم-جومارت توقاەۆتىڭ ايتۋىنشا, جاساندى ينتەللەكتىنىڭ دامۋىمەن قاۋىپ-قاتەردىڭ مۇلدەم جاڭا تۇرلەرى پايدا بولعان.

«ۇيرەنشىكتى ارەكەت ەتۋ مەحانيزمدەرى وعان بەيىمدەلىپ ۇلگەرمەي جاتىر. نەيروجەلىلەر كومەگىمەن ادامنىڭ بيومەتريالىق كوشىرمەسى جاسالاتىنىن, داۋىسىن, بەت الپەتىن, ءتىپتى مىنەز-قۇلقىن اينىتپاي سالۋعا بولاتىنىن ءبارىمىز كورىپ وتىرمىز . بۇل ازاماتتاردىڭ جەكە مالىمەتى مەن بانك ەسەپشوتتارىنا قول جەتكىزۋگە, قوعامدىق پىكىردى بۇرمالايتىن جالعان بەينەروليكتەر جاساۋعا مۇمكىندىك بەرەدى», – دەدى پرەزيدەنت.

ودان ءارى مەملەكەت باسشىسى اقپاراتتىق جۇيەلەردىڭ وسال تۇستارىنا توقتالدى. پرەزيدەنتتىڭ سوزىنشە, جىل باسىنان بەرى دەرەكتەردىڭ قولدى بولۋىنا بايلانىستى 40-تان استام فاكتى تىركەلدى.

«ەڭ ءىرى وقيعا ماۋسىم ايىندا بولدى. مۇنداي ينتسيدەنتتەردىڭ باسىم بولىگى جەكە سەكتوردا بولادى. بىراق مەملەكەت ەلىمىزدەگى تسيفرلىق قاۋىپسىزدىكتىڭ جالپى دەڭگەيىنە تولىق جاۋاپ بەرۋگە مىندەتتى. كيبەرقاۋىپسىزدىك سالاسىنداعى بۇگىنگى احۋال قۇزىرەتتەردىڭ دۇرىس بولىنبەۋى جانە شاشىراڭقىلىعى سالدارىنان كۇردەلەنىپ وتىر. ءبىر جاعىنان اقپاراتتىق قاۋىپسىزدىككە تسيفرلىق دامۋ مينيسترلىگى قۇرامىنداعى اقپاراتتىق قاۋىپسىزدىك كوميتەتى مونيتورينگ جۇرگىزەدى. ەكىنشى جاعىنان قاۋىپسىزدىك تالاپتارى بويىنشا تەحنيكالىق سىناقتار جۇرگىزۋ جانە سەرتيفيكاتتاۋ ۇلتتىق قاۋىپسىزدىك كوميتەتىنە باعىنىشتى مەملەكەتتىك تەحنيكالىق قىزمەت قۇزىرىندا. بىرىڭعاي باسقارۋ ۆەرتيكالىنىڭ بولماۋى جانە فۋنكتسيالاردىڭ قايتالانۋى مەملەكەتتىك ورگانداردىڭ كيبەرقاۋىپكە قارسى باياۋ ارەكەت ەتۋىنە سەبەپ بولادى. بۇل جاعدايدى تەز ارادا تۇزەۋ كەرەك», – دەدى پرەزيدەنت.

قاسىم-جومارت توقاەۆ قورعالعان كوممۋنيكاتسيانى قامتاماسىز ەتۋدى تاعى ءبىر ماڭىزدى مىندەت رەتىندە اتادى. ول قازىر ىسكەرلىك جانە قىزمەت بابىنداعى بايلانىستىڭ, سونىڭ ىشىندە ازاماتتاردىڭ جەكە دەرەكتەرىن بەرۋ ۇدەرىسىنىڭ باسىم بولىگى حالىقارالىق مەسسەندجەرلەر ارقىلى جۇزەگە اساتىنىن اتاپ ءوتتى.

«بۇل پلاتفورمالاردا جەكە سايكەستەندىرۋ ءنومىرىن, ازاماتتاردىڭ دەنساۋلىعى تۋرالى مالىمەتتى جانە باسقا دا دەرەكتەردى ءجيى سۇرايدى. مۇنداي تاجىريبە جەكە مالىمەتتەردى قورعاۋ تۋرالى زاڭناماعا قايشى جانە ۇلتتىق يۋريسديكتسيادان تىسقارى جەرگە دەرەكتەردىڭ تاراپ كەتۋىنە اكەلىپ سوعادى. قازاقستاندا وتاندىق Aitu مەسسەندجەرى ازىرلەندى. ول ءتيىستى قاۋىپسىزدىك دەڭگەيىن قامتاماسىز ەتە الادى. ۇكىمەت جەكە دەرەكتەردى قولداناتىن بارلىق كوممۋنيكاتسيانى قورعالعان ۇلتتىق مەسسەندجەرگە كوشىرۋ ماسەلەسىن پىسىقتاۋى كەرەك», – دەدى قاسىم-جومارت توقاەۆ.

ەسكە سالايىق, بۇعان دەيىن قازاقستاندا 16 ميلليوننان استام ازاماتتىڭ جەكە دەرەكتەرى جەلىگە تاراپ كەتكەنىن حابارلاعان ەدىك. اشىق قولجەتىمدىلىككە تۇسكەن دەرەكتەردىڭ ىشىندە ازاماتتاردىڭ اتى-ءجونى, تۋعان كۇنى, جسن, تەلەفون نومىرلەرى مەن مەكەنجايلارى بار. مەكەنجاي تىزبەگىندە ءجيى كەزدەسەتىن مەكەنجايلار قاتارىندا ستوماتولوگيا, ەمحانالار, سالىق كوميتەتى, ۋنيۆەرسيتەتتەر مەن باسقا دا ۇيىمدار كورسەتىلگەن. وز دەرەكتەرىنىڭ تارالۋىنا كۇماندانعان ازاماتتارعا eGov, ونلاين بانكينگ جانە مەملەكەتتىك كىرىستەر كوميتەتىنىڭ بازاسىنداعى بەلسەندىلىكتەرىن تەكسەرۋ ۇسىنىلادى.