قازاقستاندىقتارعا بايلىققا تەز كەنەلۋگە ۋادە بەرگەن تەندەر بويىنشا كوۋچ سوت الدىندا جاۋاپ بەردى

فوتو: gov.kz

تالدىقورعاندا مەملەكەتتىك ساتىپ الۋلار ارقىلى تابىسقا كەنەلۋدى ۇيرەتەتىن ساپاسىز كۋرسقا قاتىستى داۋعا نۇكتە قويىلدى. سوت اقشا تابامىن دەپ شىعىنعا ۇشىراعان ازاماتتاردىڭ ءوتىنىشىن قاناعاتتاندىردى. بۇل تۋرالى Stan.kz اقپارات اگەنتتىگى حابارلايدى.

داۋلى ماسەلە تۇتىنۋشى تۇرعىنداردىڭ ءبىرى ساپاسىز وقىتۋ قىزمەتىنە تاپ بولىپ, ادامدارعا «ميلليوندى پايدا» ۋادە ەتكەن كوۋچتىڭ ءىس-ارەكەتىنەن شاعىمدانعان سوڭ باستالدى. ول بۇل ماسەلە بويىنشا جەتىسۋ وبلىسىنداعى ساۋدا جانە تۇتىنۋشىلاردىڭ قۇقىقتارىن قورعاۋ دەپارتامەنتىنە جۇگىندى. ماسەلەنى تەرەڭ تالداپ, دەپارتامەنت اقپاراتتى الەۋمەتتىك جەلىلەردە جاريالاپ, 2024 جىلعى 11 قازاندا ازاماتتاردى قابىلداۋ ءىس-شاراسىن ۇيىمداستىردى. وسى كۇنى تەندەر ارقىلى تابىس تابۋعا ارنالعان سەرىكتەستىك كۋرستاردى ساتىپ العاننان كەيىن كومەك ىزدەگەن سەگىز تۇتىنۋشىنىڭ شاعىمى قارالدى.

جەتىسۋ وبلىسى بويىنشا ستققد قىزمەتكەرلەرى جۇرگىزگەن تەكسەرۋ بارىسىندا كوۋچ-كاسىپكەر رەسمي كەلىسىمشارت جاساماي, تولەم كەزىندە فيسكالدىق چەك بەرمەگەنى انىقتالدى – بۇل سالىق زاڭناماسىن بۇزعان جاعداي. ۋادە ەتىلگەن ايلىق كۋرستار ورنىنا تەك 3-4 ساباق وتكىزىلىپ, سودان كەيىن ترەنەر ءوز «جاعدايلارىنا» سىلتەمە جاساپ وقىتۋدى توقتاتقان, بۇل تىكەلەي قر «تۇتىنۋشىلاردىڭ قۇقىقتارىن قورعاۋ تۋرالى» زاڭىنىڭ 13-بابىن بۇزۋ بولىپ تابىلادى. ناتيجەسىندە, ازاماتتار ءبىلىمسىز قالىپ, اقشاسىنان دا ايىرىلدى. تۇتىنۋشىلاردىڭ كەيبىرى «پايدالى تەندەرلەر» ۇتامىز دەگەن نيەتپەنەن جانە اقشا قايتارىلۋى ۇمىتىمەن نەسيەگە الۋعا دەيىن بارعان

“دەپارتامەنت قىزمەتكەرلەرى وسى كاسىپكەرگە قاتىستى سوتقا دەيىنگى قۇجاتتارىن دايىنداۋدا تۇتىنۋشىلارعا قۇقىقتىق كومەك كورسەتىپ, 10 كۇن ىشىندە جاۋاپ بەرۋىن تالاپ ەتتى. نارازىلىق حاتقا جاۋاپ بەرمەي, كاسىپكەر زاڭدى بۇزىپ, سول سەبەپتى دەپارتامەنت تاراپىنان جوسپاردان تىس تەكسەرۋ جۇرگىزىلدى”, – دەپ مالىمدەدى ستققد باسشىسى ايدوس داۋەشەۆ.

تەكسەرۋ كەزىندە ساپاسىز قىزمەتتەن زارداپ شەككەندەر سانى 18 ادامعا جەتىپ, تەك جەتىسۋ وبلىسى ەمەس, سونىمەن قاتار الماتىلىق, كوستانايلىق جانە استانا قالاسىنىڭ تۇتىنۋشىلارى دا ءوتىنىش ءبىلدىردى. ناتيجەسىندە, جالپى زيان سوماسى 6 593 000 تەڭگەگە ارتتى. دەپارتامەنت زاڭدى مۇددەلەرىن قورعاۋ ماقساتىندا وننان استام تۇتىنۋشىنىڭ اتىنان تالدىقورعان قالاسىنىڭ سوتىنا تالاپ ارىزىن جىبەردى.

سوت پروتسەسى بارىسىندا كوۋچ-كاسىپكەر كەيبىر زارداپ شەككەن تۇتىنۋشىلارعا اقشالارىن قايتاردى: ءۇش تۇتىنۋشىعا تولىق كولەمدە 850 000 تەڭگە, ال قالعان ەكى تۇتىنۋشىعا جارتىلاي – ارقايسىسىنا 450 000 تەڭگە قايتارىلدى. دەگەنمەن سوت بارلىق تالاپتاردى تولىق قاناعاتتاندىرۋ تۋرالى شەشىم قابىلداپ, ىستەگى بارلىق تاراپتاردىڭ مۇددەسىن قورعادى.

قىزىعى, وسى ءىس بارىسىندا تاعى ءبىر وقيعا انىقتالدى: كوۋچ-ترەنەر بۇعان دەيىن قالالىق مەكتەپتەردىڭ ءبىرىنىڭ جوندەۋ تەندەرىن ۇتىپ الىپ, قۇرىلىسشىلارعا تولەم جاساماعان. الەۋمەتتىك جەلىلەردەگى داۋ-دامايدان كەيىن ول ءوز قارىزىن تەز ارادا وتەدى.