Qazaqstandyqtarǵa baılyqqa tez kenelýge ýáde bergen tender boıynsha koých sot aldynda jaýap berdi

Foto: gov.kz

Taldyqorǵanda memlekettik satyp alýlar arqyly tabysqa kenelýdi úıretetin sapasyz kýrsqa qatysty daýǵa núkte qoıyldy. Sot aqsha tabamyn dep shyǵynǵa ushyraǵan azamattardyń ótinishin qanaǵattandyrdy. Bul týraly Stan.kz aqparat agenttigi habarlaıdy.

Daýly másele tutynýshy turǵyndardyń biri sapasyz oqytý qyzmetine tap bolyp, adamdarǵa «mıllıondy paıda» ýáde etken koýchtyń is-áreketinen shaǵymdanǵan soń bastaldy. Ol bul másele boıynsha Jetisý oblysyndaǵy Saýda jáne tutynýshylardyń quqyqtaryn qorǵaý departamentine júgindi. Máseleni tereń taldap, departament aqparatty áleýmettik jelilerde jarııalap, 2024 jylǵy 11 qazanda azamattardy qabyldaý is-sharasyn uıymdastyrdy. Osy kúni tender arqyly tabys tabýǵa arnalǵan seriktestik kýrstardy satyp alǵannan keıin kómek izdegen segiz tutynýshynyń shaǵymy qaraldy.

Jetisý oblysy boıynsha STQQD qyzmetkerleri júrgizgen tekserý barysynda koých-kásipker resmı kelisimshart jasamaı, tólem kezinde fıskaldyq chek bermegeni anyqtaldy – bul salyq zańnamasyn buzǵan jaǵdaı. Ýáde etilgen aılyq kýrstar ornyna tek 3-4 sabaq ótkizilip, sodan keıin trener óz «jaǵdaılaryna» silteme jasap oqytýdy toqtatqan, bul tikeleı QR «Tutynýshylardyń quqyqtaryn qorǵaý týraly» Zańynyń 13-babyn buzý bolyp tabylady. Nátıjesinde, azamattar bilimsiz qalyp, aqshasynan da aıyryldy. Tutynýshylardyń keıbiri «paıdaly tenderler» utamyz degen nıetpenen jáne aqsha qaıtarylýy úmitimen nesıege alýǵa deıin barǵan

“Departament qyzmetkerleri osy kásipkerge qatysty sotqa deıingi qujattaryn daıyndaýda tutynýshylarǵa quqyqtyq kómek kórsetip, 10 kún ishinde jaýap berýin talap etti. Narazylyq hatqa jaýap bermeı, kásipker zańdy buzyp, sol sebepti departament tarapynan jospardan tys tekserý júrgizildi”, – dep málimdedi STQQD basshysy Aıdos Daýeshev.

Tekserý kezinde sapasyz qyzmetten zardap shekkender sany 18 adamǵa jetip, tek Jetisý oblysy emes, sonymen qatar Almatylyq, Kostanaılyq jáne Astana qalasynyń tutynýshylary da ótinish bildirdi. Nátıjesinde, jalpy zııan somasy 6 593 000 teńgege artty. Departament zańdy múddelerin qorǵaý maqsatynda onnan astam tutynýshynyń atynan Taldyqorǵan qalasynyń sotyna talap aryzyn jiberdi.

Sot proesi barysynda koých-kásipker keıbir zardap shekken tutynýshylarǵa aqshalaryn qaıtardy: úsh tutynýshyǵa tolyq kólemde 850 000 teńge, al qalǵan eki tutynýshyǵa jartylaı – árqaısysyna 450 000 teńge qaıtaryldy. Degenmen sot barlyq talaptardy tolyq qanaǵattandyrý týraly sheshim qabyldap, istegi barlyq taraptardyń múddesin qorǵady.

Qyzyǵy, osy is barysynda taǵy bir oqıǵa anyqtaldy: koých-trener buǵan deıin qalalyq mektepterdiń biriniń jóndeý tenderin utyp alyp, qurylysshylarǵa tólem jasamaǵan. Áleýmettik jelilerdegi daý-damaıdan keıin ol óz qaryzyn tez arada ótedi.