جاڭالىقتار
قازاقستانعا تاۋىق جۇمىرتقاسىن اكەلۋگە تىيىم سالىندى
فوتو:الەكسەي مالگاۆكو
اۋىل شارۋاشىلىعى ءمينيسترىنىڭ بۇيرىعىمەن قازاقستانعا بارلىق كولىك تۇرلەرىمەن ءۇشىنشى ەلدەردەن جانە ەۋرازيالىق ەكونوميكالىق وداق ەلدەرىنەن تاۋىق جۇمىرتقالارىن اكەلۋگە التى اي مەرزىمگە تىيىم سالىندى, – دەپ حابارلايدى qandastar.kz
«قازاقستان رەسپۋبليكاسىنىڭ اۋماعىنا تاۋىق جۇمىرتقالارىن اكەلۋگە تىيىم سالۋدى ەنگىزۋ تۋرالى» قازاقستان رەسپۋبليكاسى اۋىل شارۋاشىلىعى ءمينيسترىنىڭ 2025 جىلعى 4 ساۋىردەگى № 101 بۇيرىعىمەن قازاقستان رەسپۋبليكاسىنىڭ اۋماعىنا بارلىق كولىك تۇرلەرىمەن ءۇشىنشى ەلدەردەن جانە ەۋرازيالىق ەكونوميكالىق وداق ەلدەرىنەن تاۋىق جۇمىرتقالارىن (سەق تن: 040721) اكەلۋگە التى اي مەرزىمگە تىيىم سالىندى, — دەلىنگەن مينيسترلىكتىڭ حابارلاماسىندا.
ايتا كەتۋ كەرەك, تىيىم قازاقستان رەسپۋبليكاسىنىڭ اۋماعى ارقىلى تاۋىق جۇمىرتقالارىنىڭ ترانزيتىن, سونداي-اق ولاردىڭ ەۋرازيالىق ەكونوميكالىق وداققا مۇشە ءبىر مەملەكەتتىڭ اۋماعىنان ەۋرازيالىق ەكونوميكالىق وداققا مۇشە ەكىنشى مەملەكەتتىڭ اۋماعىنا قازاقستان رەسپۋبليكاسىنىڭ اۋماعى ارقىلى وتۋىنە قاتىستى قولدانىلمايدى.
تاعامدىق جۇمىرتقا يمپورتىنا ۋاقىتشا تىيىم كوكتەمگى-جازعى كەزەڭدە وتاندىق تاۋار وندىرۋشىلەردى قولداۋ ماقساتىندا ەنگىزىلدى.
ايتا كەتۋ كەرەك, وسى كەزەڭدەردە جۇمىرتقاعا سۇرانىستىڭ تومەندەۋى بايقالادى, نارىقتىڭ قاجەتتىلىكتەرى ونەركاسىپتىك ءوندىرىس ارقاسىندا جانە ءۇي شارۋاشىلىعى ونىمدەرىنىڭ نارىقتا بەلسەندى بولۋىمەن تولىعىمەن جابىلادى. بۇل فاكتور قۇس فابريكالارىنىڭ قىزمەتىنە تەرىس اسەر ەتەدى, جۇمىرتقا باعاسى تومەندەيدى. باعانىڭ وزىندىك قۇننان تومەن ءتۇسۋى كاسىپورىنداردىڭ رەنتابەلدىلىگىنە تەرىس اسەر ەتەدى.
سونداي-اق وسى كەزەڭدە جۇمىرتقانى ساقتاۋ مەرزىمى قىسقارادى, بۇل رەتتە تەحنولوگيالىق ەرەكشەلىكتەرگە بايلانىستى جۇمىرتقا ءوندىرۋ كولەمى ازايمايدى, بۇل قويمالاردا تاۋاردىڭ ارتىق جينالۋىنا اكەلەدى.
وسىعان بايلانىستى, وتاندىق تاۋار وندىرۋشىلەردى قولداۋ جانە ىشكى نارىقتى قورعاۋ ماقساتىندا سىرتقى ساۋدا ساياساتى جانە حالىقارالىق ەكونوميكالىق ۇيىمدارعا قاتىسۋ ماسەلەلەرى جونىندەگى ۆەدومستۆوارالىق كوميسسيادا كوكتەمگى-جازعى كەزەڭگە بارلىق كولىك تۇرلەرىمەن تاۋىق جۇمىرتقالارىن قازاقستان رەسپۋبليكاسىنىڭ اۋماعىنا اكەلۋگە ۋاقىتشا شەكتەۋ شارالارىن بەلگىلەۋدىڭ ورىندىلىعى ماقۇلدانعان بولاتىن.
بۇيرىق 2025 جىلدىڭ 9 ساۋىرىنەن باستاپ كۇشىنە ەنەدى.
