Jańalyqtar
Qazaqstanǵa taýyq jumyrtqasyn ákelýge tyıym salyndy
Foto:Alekseı Malgavko
Aýyl sharýashylyǵy mınıstriniń buıryǵymen Qazaqstanǵa barlyq kólik túrlerimen úshinshi elderden jáne Eýrazııalyq ekonomıkalyq odaq elderinen taýyq jumyrtqalaryn ákelýge alty aı merzimge tyıym salyndy, – dep habarlaıdy qandastar.kz
«Qazaqstan Respýblıkasynyń aýmaǵyna taýyq jumyrtqalaryn ákelýge tyıym salýdy engizý týraly» Qazaqstan Respýblıkasy Aýyl sharýashylyǵy mınıstriniń 2025 jylǵy 4 sáýirdegi № 101 buıryǵymen Qazaqstan Respýblıkasynyń aýmaǵyna barlyq kólik túrlerimen úshinshi elderden jáne Eýrazııalyq ekonomıkalyq odaq elderinen taýyq jumyrtqalaryn (SEQ TN: 040721) ákelýge alty aı merzimge tyıym salyndy, — delingen mınıstrliktiń habarlamasynda.
Aıta ketý kerek, tyıym Qazaqstan Respýblıkasynyń aýmaǵy arqyly taýyq jumyrtqalarynyń tranzıtin, sondaı-aq olardyń Eýrazııalyq ekonomıkalyq odaqqa múshe bir memlekettiń aýmaǵynan Eýrazııalyq ekonomıkalyq odaqqa múshe ekinshi memlekettiń aýmaǵyna Qazaqstan Respýblıkasynyń aýmaǵy arqyly ótýine qatysty qoldanylmaıdy.
Taǵamdyq jumyrtqa ımportyna ýaqytsha tyıym kóktemgi-jazǵy kezeńde otandyq taýar óndirýshilerdi qoldaý maqsatynda engizildi.
Aıta ketý kerek, osy kezeńderde jumyrtqaǵa suranystyń tómendeýi baıqalady, naryqtyń qajettilikteri ónerkásiptik óndiris arqasynda jáne úı sharýashylyǵy ónimderiniń naryqta belsendi bolýymen tolyǵymen jabylady. Bul faktor qus fabrıkalarynyń qyzmetine teris áser etedi, jumyrtqa baǵasy tómendeıdi. Baǵanyń ózindik qunnan tómen túsýi kásiporyndardyń rentabeldiligine teris áser etedi.
Sondaı-aq osy kezeńde jumyrtqany saqtaý merzimi qysqarady, bul rette tehnologııalyq erekshelikterge baılanysty jumyrtqa óndirý kólemi azaımaıdy, bul qoımalarda taýardyń artyq jınalýyna ákeledi.
Osyǵan baılanysty, otandyq taýar óndirýshilerdi qoldaý jáne ishki naryqty qorǵaý maqsatynda Syrtqy saýda saıasaty jáne halyqaralyq ekonomıkalyq uıymdarǵa qatysý máseleleri jónindegi vedomstvoaralyq komıssııada kóktemgi-jazǵy kezeńge barlyq kólik túrlerimen taýyq jumyrtqalaryn Qazaqstan Respýblıkasynyń aýmaǵyna ákelýge ýaqytsha shekteý sharalaryn belgileýdiń oryndylyǵy maquldanǵan bolatyn.
Buıryq 2025 jyldyń 9 sáýirinen bastap kúshine enedi.
