قازاقستاننىڭ 4 قالاسىندا تەرروريستىك قاۋىپتىڭ سارى دەڭگەيى ەنگىزىلەدى

فوتو: اشىق دەرەككوز

ۇلتتىق قاۋىپسىزدىك كوميتەتى استانا, الماتى, قاراعاندى جانە كوكشەتاۋ قالالارىندا تەرروريستىك قاۋىپتىڭ «سارى» دەڭگەيى ەنگىزىلەتىنىن مالىمدەدىى. بۇل تۋرالى Stan.kz اقپارات اگەنتتىگى حابارلايدى.

2-5 شىلدە ارالىعىندا قازاقستاندا بىرقاتار ماڭىزدى حالىقارالىق ءىس-شارالار, سونىڭ ىشىندە شانحاي ىنتىماقتاستىق ۇيىمىنا مۇشە مەملەكەتتەر باسشىلارى كەڭەسى جانە قىتاي حالىق رەسپۋبليكاسى توراعاسىنىڭ مەملەكەتتىك ساپارى وتەدى.

“وسىعان وراي الەمگە بەلگىلى تاجىريبەگە سايكەس ۋاكىلەتتى مەملەكەتتىك ورگاندار كەلەتىن شەتەلدىك دەلەگاتسيالاردىڭ, ولاردىڭ ىشىندە مەملەكەت باسشىلارى مەن حالىقارالىق ۇيىمدار باسشىلارىنىڭ قاۋىپسىزدىگىن جوعارى دەڭگەيدە قامتاماسىز ەتۋگە تولىققاندى شارالار قابىلدايدى”, – دەلىنگەن حابارلامادا.

ۆەدومستۆو وكىلدەرى «تەرروريزمگە قارسى ءىس-قيمىل تۋرالى» زاڭنىڭ 12, 13 جانە 15-باپتارىنا سايكەس, كۇزەتىلەتىن تۇلعالاردىڭ قاۋىپسىزدىگىن قامتاماسىز ەتۋ بويىنشا كۇزەت ءىس-شارالارىن وتكىزۋ كەزىندە تەرروريزمگە قارسى كۇرەس جونىندەگى رەسپۋبليكالىق جەدەل شتابتىڭ باسشىسى رەتىندە قازاقستان رەسپۋبليكاسى مەملەكەتتىك كۇزەت قىزمەتى باستىعىنىڭ شەشىمى بويىنشا استانا, الماتى, قاراعاندى جانە كوكشەتاۋ قالالارىنىڭ جەكەلەگەن ۋچاسكەلەرىندە تەرروريزمگە قارسى وپەراتسيانىڭ قۇقىقتىق رەجيمىندە قۇقىقتىق ءتارتىپ پەن قوعامدىق قاۋىپسىزدىكتى قولداۋ ءىس-شارالارى وتەتىنىن حابارلادى.

قۇقىقتىق رەجيم 2 شىلدە ساعات 00:01-دەن 4 شىلدە ساعات 23:59-عا دەيىن شانحان ىنتىماقتاستىق ۇيىمى سامميتى وتەتىن اۋماقتار مەن كۇزەتىلەتىن تۇلعالار جۇرەتىن باعىتتار بويىنشا بەلگىلەنگەن.

كۇزەتىلەتىن تۇلعالاردىڭ اقمولا, قاراعاندى وبلىسى مەن الماتى قالاسى اۋماعىنا كەلگەن جاعدايدا ولار كەلگەن كەزەڭگە جانە اتالعان وڭىرلەرگە بولاتىن ورىندارىنا تەرروريزمگە قارسى وپەراتسيانىڭ قۇقىقتىق رەجيمى ورناتىلادى.

تەرروريزمگە قارسى وپەراتسيا وتكىزۋ ايماقتارىندا كۇزەتىلەتىن تۇلعالار بولعان كەزەڭدەرىندە ول ايماقتاردا ادامداردىڭ جانە اۆتوكولىكتەردىڭ قوزعالۋلارىنا شەكتەۋ شارالارى قولدانىلادى.

كۇزەتىلەتىن تۇلعالاردىڭ جۇرەتىن ارنايى تراسسالار ۋچاسكەلەرىندە قالالىق جولاۋشىلار كولىكتەرىنىڭ قوزعالىستارى توقتاتىلادى. ءتيىستى باعدارلارداعى وزگەرتۋلەر تۋرالى استانا قالاسىنىڭ اكىمدىگى حابارلايدى.

بۇدان باسقا, قازاقستان رەسپۋبليكاسى پرەزيدەنتىنىڭ 2013 جىلعى 9 تامىزداعى №611 جارلىعىمەن بەكىتىلگەن «تەرروريزم اكتىسى قاتەرىنىڭ تۋىنداۋى تۋرالى اقپارات مونيتورينگىنىڭ جانە حالىقتى حاباردار ەتۋدىڭ مەملەكەتتىك جۇيەسىنىڭ ۇيىمداستىرىلۋى مەن جۇمىس ىستەۋ قاعيدالارىنا» سايكەس تەرروريزمگە قارسى وپەراتسيانىڭ قۇقىقتىق رەجيمى ەنگىزىلۋىن ەسكەرە وتىرىپ, استانا, الماتى, قاراعاندى جانە كوكشەتاۋ قالالارىنىڭ شانحاي ىنتىماقتاستىق ۇيىمىنىڭ ءسامميتىن وتكىزۋ وبەكتىلەرىندە 2 شىلدە ساعات 00:01-دەن باستاپ 4 شىلدە ساعات 23:59-عا دەيىن تەرروريستىك قاۋىپتىڭ بىرقالىپتى («سارى») دەڭگەيى بەلگىلەنەدى.

بىرقالىپتى («سارى») دەڭگەي ۋاكىلەتتى مەملەكەتتىك ورگانداردىڭ ۇيىمداستىرۋشىلىق, اكىمشىلىك جانە جەدەل ءىس-شارالار كەشەنىن وتكىزۋدى كوزدەيدى, اتاپ ايتقاندا:

• جەكەلەگەن اۋماقتاردا كولىك قۇرالدارى مەن جاياۋ جۇرگىنشىلەردىڭ قوزعالىستارىنا شەكتەۋ ەنگىزەدى;
• كينولوگيا قىزمەتىنىڭ ماماندارىن تارتا وتىرىپ, كوشەلەردە, الاڭداردا, ستاديونداردا, سكۆەرلەردە, ساياباقتاردا, ماگيسترالدى تەمىرجول جەلىلەرىندە, تەمىرجول ۆوكزالدارىندا, اۆتوۆوكزالداردا, اۋەجايلاردا, مەتروپوليتەن وبەكتىلەرىندە, بۇقارالىق جانە جاپپاي ءىس-شارالار وتەتىن ورىنداردا پاترۋلدەردى كۇشەيتەدى;
• جارىلعىش قۇرىلعىلاردى انىقتاۋ جانە جويۋ بويىنشا تەرروريستىك تۇرعىدان وسال وبەكتىلەرگە جانە ادامدار كوپ جينالاتىن ورىندارعا, بۇقارالىق جانە جاپپاي ءىس-شارالارعا قاتىسۋشىلاردىڭ قوزعالۋلارىنىڭ نەگىزگى باعدارلارىنا تەكسەرۋ جۇرگىزەدى;
• اۋەجايلاردا, مەتروپوليتەن وبەكتىلەرىندە, تەمىرجول ۆوكزالدارىندا جانە اۆتوۆوكزالداردا جەتە تەكسەرۋ ءىس-شارالارىن وتكىزۋ بارىسىندا ارنايى تەحنيكا قۇرالدارىن پايدالانۋ ارقىلى رەجيمدىك شارالاردى كۇشەيتەدى.

ۇلتتىق قاۋىپسىزدىك كوميتەتى ارنايى مەملەكەتتىك جانە قۇقىق قورعاۋ ورگاندارىنىڭ جۇمىسىنا تۇسىنىكپەن قارالاۋلارىڭىزدى جانە ولاردىڭ قىزمەتكەرلەرىنىڭ زاڭدى تالاپتارىن ساقتاۋدى سۇرادى.