جاڭالىقتار
قازاقستاننىڭ بىرنەشە وڭىرىندە جۇرگىزۋشىلەر اۆتوگاز تاپپاي, ۇزىن-سونار كەزەكتە تۇر
فوتو: ۆيدەودان سكرين
قازاقستاننىڭ اقتوبە مەن باتىس قازاقستان وبلىسىندا جۇرگىزۋشىلەر اۆتوگاز تاپپاي, تاعى تىعىرىققا تىرەلدى. وڭىردە سۇيىتىلعان وتىن تاپشى. بەكەتتەردە ۇزىن-سونار كەزەك پايدا بولىپ, كوپ جەردە گاز تالونمەن بەرىلىپ جاتىر. بۇل تۋرالى Stan.kz اقپارات اگەنتتىگى ينفورمبيۋرو باعدارلاماسىنا سىلتەمە جاساپ حابارلايدى.
دەرەكتەرگە سەنسەك, شەنەۋنىكتەر وڭىردە گازبەن جۇرەتىن كولىكتەر كەيىنگى جىلدارى كۇرت كوبەيىپتى. سونىڭ كەسىرىنەن اي سايىن ايماققا بەرىلەتىن 4 مىڭ تونناعا جۋىق گاز جەتپەي جاتقانىن جاسىرمايدى.
قالاداعى كولىك جۇرگىزۋشىلەرىنىڭ تەڭ جارتىسى گازبەن جۇرەدى. ءتوزىمى تاۋسىلعان ازاماتتار جىل سايىن كۇزدە وسى جاعدايعا تاپ بولامىز دەپ وتىر. قازىر اقتوبەدە ءبىر ليتر گازدىڭ قۇنى – 59 تەڭگە.
«تالوندى بىلمەيمىز قايدان الۋعا, تالون دا دۇرىس جوق. مىناۋ ءبىر بىتپەيتىن كەزەك. بۇكىل قالادا وسىلاي, دالاعا شىققاندا دا, مارتۋك جاقتا دا, قاندىاعاش جاقتا دا گاز جوق. ادامداردى قيناپ بولدى عوي, نە دەگەن ماسقارا?! ال شەنەۋنىكتەر بۇل جاعدايدى قۇرىلىس جۇمىستارىنىڭ ارتۋىمەن بايلانىستىرادى. قىركۇيەك ايىندا وڭىرگە 11 337 توننا گاز بولىنگەن. بىراق ول جەتپەي, ەنەرگەتيكا مينيسترلىگىنەن تاعى ەكى توننا سۇيىتىلعان گاز سۇراتتىق دەيدى. وبلىستاعى مۇناي كومپانياسىنان الىنعان اۆتوگازدىڭ ءبىر بولىگى جولدا ەكەن. سوندىقتان ماسەلە اپتا سوڭىنا دەيىن شەشىلەدى دەيدى جاۋاپتى باسقارما باسشىسى», – دەدى جۇرگىزۋشى ورىنباي بايداۋلەتوۆ.
اقتوبە وبلىستىق كاسىپكەرلىك باسقارماسىنىڭ باسشىسى گازدى تاسىمالداۋ باستالعانىن حابارلادى.
«بۇگىن كەشكە دەيىن, ەرتەڭ اماندىق بولسا تۇسكە دەيىن اقتوبە وبلىسىنا 30 ۆاگون كەلەدى. ول – 1 080 توننا. ول قالانى تولىعىمەن جابۋعا جەتەدى. سونىمەن قاتار 5 قازاننان باستاپ قوسىمشا گازدىڭ كولەمىن تاسىمالداۋ باستالادى. قازان ايىندا بارلىعى گازبەن قامتىلادى», – دەدى باسقارما باسشىسى الماس سالىقباەۆ.
ەسكە سالايىق, بۇعان دەيىن ەنەرگەتيكا ۆيتسە-ءمينيسترى الىبەك جاماۋوۆ 2025 جىلى قازاقستاندا اۆتوگاز باعاسى تاعى دا كوتەرىلەتىنىن ايتتى. ەنەرگەتيكا ۆيتسە-ءمينيسترى الىبەك جاماۋوۆ 2025 جىلى قازاقستاندا اۆتوگاز باعاسى تاعى دا كوتەرىلەتىنىن ايتتى. كەلەسى جىلى دا گاز شامامەن 10 تەڭگەگە قىمباتتايدى.
