جاڭالىقتار
قازاقستاننىڭ دەپوزيتتەرگە كەپىلدىك بەرۋ قورىنىڭ قاراجاتى جەكە قولعا بەرىلە باستادى
الماتىدا بىرنەشە باسقارۋشى كومپانيالاردىڭ وكىلدەرىمەن كەلىسىمگە قول قويىلدى,-دەپ حابارلايدى Qandastar.kz
قازاقستان ۇلتتىق بانكى «قازاقستاننىڭ دەپوزيتتەرگە كەپىلدىك بەرۋ قورى» اق (قدكبق) اكتيۆتەرىن جەكە باسقارۋشى كومپانيالارعا سەنىمگەرلىك باسقارۋعا بەرۋ باستالعانىن حابارلادى.
«قاراجاتتى بەرۋ ۇبك-نىڭ باعالى قاعازدار نارىعىن دامىتۋ جانە ەنشىلەس ۇيىمداردىڭ اكتيۆتەرىن باسقارۋدان بىرتىندەپ كەتۋ جونىندەگى ستراتەگياسى شەڭبەرىندە جۇزەگە اسىرىلادى», – دەدى ۇلتتىق بانك.
الماتىدا بىرنەشە باسقارۋشى كومپانيالاردىڭ وكىلدەرىمەن كەلىسىمگە قول قويۋ ءراسىمى ءوتتى. ۇلتتىق بانك اكتيۆتەردىڭ تەك ءبىر بولىگى عانا بەرىلگەنىن ايتتى. قدكبق توراعاسى ءادىل وتەمباەۆ بەرىلەتىن اكتيۆتەردى ساقتاۋ ءۇشىن بارلىق شارا قابىلدانىپ جاتقانىنا سەندىردى.
ءبىز تاۋەكەلدەردى باعالادىق جانە جەكە كومپانيالار ءۇشىن ينۆەستيتسيالىق ساياساتتى ازىرلەدىك, وعان سايكەس قازاقستان رەسپۋبليكاسىنىڭ مەملەكەتتىك باعالى قاعازدارى, كۆازيمەملەكەتتىك سەكتور سۋبەكتىلەرىنىڭ جانە وتەۋ مەرزىمى ءۇش جىلعا دەيىنگى حالىقارالىق قارجى ۇيىمدارىنىڭ وبليگاتسيالارى, سونداي-اق كەرى رەپو وپەراتسيالارى سياقتى سەنىمدى قارجى قۇرالدارىنا عانا ينۆەستيتسيا جاسالادى», – دەدى ول.
ونىڭ ايتۋىنشا, شارتتا تاۋەكەلدەر تۋىنداعان كەزدە قدكبق ءۇشىن ونى بىرجاقتى بۇزۋ مۇمكىندىگى قاراستىرىلعان. ۇبك مونەتارلىق وپەراتسيالار دەپارتامەنتىنىڭ ديرەكتورى نۇرجان تۇرسىنحانوۆ قازاقستان قور بيرجاسىنىڭ الاڭىندا قدكبق اكتيۆتەرىن يندەكستىك باسقارۋ ماقساتىندا مەملەكەتتىك باعالى قاعازدار يندەكسى ازىرلەنىپ, ىسكە قوسىلعانىن ايتتى.
«اكتيۆتەردى بەرۋ وتاندىق باعالى قاعازدار نارىعىنا ەلەۋلى سەرپىن بەرەدى, باسقارۋداعى اكتيۆتەر كولەمىن ۇلعايتۋ مۇمكىندىگى ەسەبىنەن جەكە باسقارۋشى كومپانيالار نارىعىن دامىتۋعا, سونداي-اق باسقارۋشىلار اراسىندا باسەكەلەستىكتى كۇشەيتۋ ەسەبىنەن بەرىلگەن اكتيۆتەردى باسقارۋ تيىمدىلىگىن ارتتىرۋعا ىقپال ەتەتىن بولادى», – دەدى تۇرسىنحانوۆ.
بۇگىنگى تاڭدا قدكبق ارنايى رەزەرۆىنىڭ اكتيۆتەرىنىڭ مولشەرى 1,2 ترلن تەڭگە بولدى. باستاپقى كەزەڭدە 200 ملرد تەڭگە بەرىلەدى. اكتيۆتەردى ودان ءارى بەرۋ جەكە باسقارۋشى كومپانيالاردىڭ تيىمدىلىك كورسەتكىشتەرىنە بايلانىستى كەزەڭ-كەزەڭىمەن جۇزەگە اسىرىلادى.
