قازاقستاننىڭ ەكى وبلىسىندا ءورت اۋماعى ون ەسە ۇلعايىپ, 31 مىڭ گەكتارعا ءوستى

فوتو: ۆيدەو سكرين

قاراعاندى مەن پاۆلودار وبلىستارىنداعى ءورت اۋماعى ون ەسە ۇلعايدى. بۇل تۋرالى qandastar.kz Stan.kz اقپارات اگەنتتىگىنە سىلتەمە جاساپ حابارلايدى.

توتەنشە جاعدايلار دەپارتامەنتى مەن وبلىس اكىمدىگىنىڭ مالىمەتىنشە, قازىر قاراعاندى وبلىسىندا 21 مىڭ گەكتار, پاۆلودار وبلىسىندا 10 مىڭ گەكتار جەر ورتكە وراندى.

توتەنشە جاعدايلار دەپارتامەنتىنىڭ مالىمەتىنشە, ساعات 15:00-گە دەيىن قاراعاندى وبلىسىنىڭ دالاسىنداعى ءورت 21 مىڭ گەكتارعا جەتكەن.

«ساعات 14:30-دا پاۆلودار وبلىسىنىڭ باياناۋىل اۋدانىندا جالپى اۋماعى 10 مىڭ گەكتاردى قۇرايتىن دالا ءورتى وقشاۋلاندى. ەكى وبلىستاعى ءورتتى سوندىرۋگە توتەنشە جاعدايلار دەپارتامەنتى, توتەنشە جاعدايلار مينيسترلىگى مەن باسقا دا مەملەكەتتىك ورگانداردان 401 ادام جۇمىلدىرىلعان. ولار 68 تەحنيكا بىرلىگىن, سونداي-اق ءۇش ۇشقىشسىز ۇشاتىن اپپارات پەن 2 مي-8 تىكۇشاعىن پايدالانادى», – دەلىنگەن حابارلامادا.

ءبىر كۇن بۇرىن قاراعاندى وبلىسىنىڭ قارقارالى اۋدانىندا قۇرعاق ءشوپتىڭ ورتەنۋىنەن ۇلكەن جالىن شارپىدى. دالا ءورتى پاۆلودار وبلىسىنىڭ اۋماعىنا جايىلدى. ودان كەيىن 3 مىڭ گەكتاردان استام جەر ورتەنىپ جاتقان. قۇتقارۋشىلار قاتتى جەل مەن تاۋلى جەردىڭ سالدارىنان ءورتتى ءسوندىرۋ قيىنعا سوققانىن حابارلادى.

ونى ءسوندىرۋ كەزىندە ءبىر ءورت ءسوندىرۋشى قازا تاپتى, تاعى ەكى ادام كۇيىكپەن اۋرۋحاناعا جەتكىزىلدى.

وبلىستىق بيلىك ازاماتتارعا اقپاراتتىق-پسيحولوگيالىق قولداۋ كورسەتۋ ءۇشىن سەنىم تەلەفوندارىن اشتى:

قاراعاندى وبلىسىنىڭ توتەنشە جاعدايلار دەپارتامەنتى – 8 721 2 51 72 23,

پاۆلودار وبلىسىنىڭ توتەنشە جاعدايلار دەپارتامەنتى – 8 718 2 20 11 12.