قازاقستاننىڭ رەسەيدەگى ەلشىلىگى ازاماتتارعا ۇندەۋ جاسادى

فوتو: اشىق دەرەككوز

رەسەيدە ەلگە كىرۋ جانە شىعۋ كەزىندە شەتەل ازاماتتارىنان جانە ازاماتتىعى جوق ادامداردان بيومەتريالىق دەرەگىن جيناۋ بويىنشا ەكسپەريمەنتتىك جوبا باستالدى. وسىعان بايلانىستى قازاقستاننىڭ رەسەيدەگى ەلشىلىگى ازاماتتارعا ۇندەۋ جاسادى, دەپ جازدى qandastar.kz

ەلشىلىكتىڭ مالىمەتىنە سۇيەنسەك, ەكسپەريمەنتتىڭ ءبىرىنشى كەزەڭىندە, 2024 جىلعى 1 جەلتوقساننان 2025 جىلعى 30 ماۋسىمعا دەيىن ماسكەۋ قالاسىنىڭ حالىقارالىق اۋەجايلارىنا (دومودەدوۆو, شەرەمەتەۆو, ۆنۋكوۆو جانە جۋكوۆسكي), سونداي-اق ورىنبور وبلىسىنداعى «ماشتاكوۆو» اۆتوموبيل وتكىزۋ پۋنكتى ارقىلى ەلگە كىرەتىن قازاقستان ازاماتتارى بيومەتريالىق دەرەكتەرىن – بەت بەينەسى مەن ساۋساق ىزدەرىن تاپسىرۋعا مىندەتتى.

ەكىنشى كەزەڭدە, 2025 جىلدىڭ 30 ماۋسىمىنان 2026 جىلدىڭ 30 ماۋسىمىنا دەيىن جوبا رەسەيدىڭ مەملەكەتتىك شەكاراسىنداعى بارلىق وتكىزۋ پۋنكتتەرىن قامتيدى. بۇل كەزەڭدە ەلگە كىرۋشى ءاربىر شەتەلدىكتىڭ تسيفرلىق بەيىنى قالىپتاستىرىلاتىن بولادى.

«بۇل رەتتە مۇنداي بەيىندى RuID قوسىمشاسى ارقىلى ءوز بەتىنشە قۇرۋعا بولادى. ول باسقا مەملەكەتتەردىڭ ازاماتتارى ءۇشىن مەملەكەتتىك قىزمەتتەردىڭ انالوگى بولادى جانە ساپار تۋرالى حابارلاۋعا, سونداي-اق رەسەي اۋماعىندا ءارتۇرلى مەملەكەتتىك قىزمەتتەردى الۋعا مۇمكىندىك بەرەدى (مىسالى, مەديتسينالىق ساقتاندىرۋدى راسىمدەۋ). تسيفرلىق بەيىن بىرقاتار مەملەكەتتىك جۇيەگە, ونىڭ ىشىندە مەملەكەتتىك كورسەتىلەتىن قىزمەتتەر جۇيەسىنە ەنگىزىلەدى. شەكارادان ءوتۋ پۋنكتتەرىندەگى قوسىمشا تارتىپتەرگە الدىن الا دايىن بولۋدى ۇسىنامىز», – دەلىنگەن حابارلامادا.

اتالعان جوبا تالاپتارىنان:

• رەسەيدە اككرەديتتەلگەن ديپلوماتيالىق وكىلدىكتەر مەن حالىقارالىق ۇيىمداردىڭ قىزمەتكەرلەرى جانە ولاردىڭ وتباسى مۇشەلەرى;
• ديپلوماتيالىق جانە قىزمەتتىك پاسپورتتاردىڭ يەلەرى;
• 6 جاسقا دەيىنگى بالالار بوساتىلادى.