قازاقستاننىڭ تاجىريبەسى شىۇ قىزمەتىنە سەرپىلىس بەردى – وزبەكستاندىق ساراپشى

ساراپشى اتاپ وتكەندەي, قازاقستاننىڭ حالىقارالىق ۇيىمدارعا توراعالىق ەتۋدە تاجىريبەسى مول. اتاپ ايتقاندا, ەلىمىز بۇعان دەيىن تاۋەلسىز مەملەكەتتەر دوستاستىعى, ەۋرازيالىق ەكونوميكالىق وداق, ۇجىمدىق قاۋىپسىزدىك تۋرالى شارت ۇيىمى سياقتى قۇرىلىمدارعا جەتەكشىلىك ەتتى.

«قازاقستان شىۇ-نىڭ بەلدى مۇشەسى رەتىندە ونىڭ دامۋىنا جانە قىزمەت باعىتىن ناقتىلاۋعا زور ۇلەس قوستى. بۇل ورايدا اتاپ وتەتىن ەرەكشەلىك بار: شىۇ مەملەكەتتەرى باسشىلارىنىڭ ىشىندە تەك قاسىم-جومارت توقاەۆ قانا كاسىبي ديپلومات سانالادى. سوندىقتان وسى باعىتتاعى قازاقستاننىڭ تاجىريبەسى توراعالىق ەتۋ كەزىندە ايرىقشا سەزىلدى, ۇيىمنىڭ قىزمەتىنە سەرپىلىس بەردى», — دەپ باعا بەردى ساراپشى.

راۆشان نازاروۆتىڭ سوزىنشە, ءوڭىر ەلدەرىنىڭ شىۇ-عا قىزىعۋشىلىعى جىل سايىن ارتىپ كەلەدى. بۇل رەتتە, ول وسىدان 2 جىل بۇرىن ۇيىمعا يران يسلام رەسپۋبليكاسىنىڭ مۇشە بولعانىن ەرەكشە اتاپ ءوتتى.

«يراننىڭ شىۇ-عا تولىق مۇشە بولۋى ۇيىمنىڭ سالماعىن ارتتىرىپ, بەدەلىن كوتەرۋگە ىقپال ەتتى. سونىمەن قاتار, قازىرگى ۋاقىتتا بەلارۋس تە بۇل قۇرىلىمنىڭ قاتارىن تولىقتىرۋعا نيەتتى ەكەنىن مالىمدەپ جاتىر. العاشىندا «شانحاي بەستىگى» بولىپ قۇرىلعان ۇيىم شەكارا ماسەلەلەرىن شەشۋمەن اينالىستى. كەيىن وعان وزبەكستان قوسىلىپ, شىۇ اۋقىمدى قۇرىلىمعا اينالا باستادى», — دەدى ر. نازاروۆ.

باستاپقىدا شىۇ-نىڭ قىزمەتى ايماقتىق قاۋىپسىزدىك ماسەلەلەرىن شەشۋگە باعىتتالسا, قازىرگى كۇنى ول الەۋمەتتىك-ەكونوميكالىق ىنتىماقتاستىققا ويىسىپ كەلەدى. ساراپشى ۇيىمعا مۇشە ەلدەردىڭ الەۋەتى مول ەكەنىن ەسكەرە وتىرىپ, سول مۇمكىندىكتى بىرلەسە دامۋعا نەگىزدەۋ ماڭىزدى ەكەنىنە توقتالدى.

«جەر شارىنىڭ جارتى حالقى شىۇ-عا مۇشە ەلدەردىڭ ۇلەسىندە. بۇل ۇيىمنىڭ پەرسپەكتيۆالى ەكەنىن بىلدىرەدى. سوندىقتان استانادا وتەتىن سامميتتە قابىلداناتىن ماڭىزدى قۇجاتتار وسى مۇمكىندىكتەردى ەسكەرەدى دەپ سەنەمىز. بۇل رەتتە, مەملەكەت باسشىلارى شىۇ اياسىنداعى الداعى ىنتىماقتاستىقتىڭ باعدارى رەتىندە الەۋمەتتىك-ەكونوميكالىق جانە مادەني-گۋمانيتارلىق سالالارعا باسىمدىق بەرۋى ىقتيمال», — دەپ تۇيىندەدى راۆشان نازاروۆ.

ەسكە سالايىق, 3-4 شىلدەدە استانادا شانحاي ىنتىماقتاستىق ۇيىمىنىڭ ءسامميتى وتەدى. ونىڭ قورىتىندىسى بويىنشا بىرنەشە ماڭىزدى قۇجاتتى قابىلداۋ جوسپارلانىپ وتىر.

قوسا كەتسەك, سامميت وتەتىن ارالىقتا ەلوردانىڭ اۋە كەڭىستىگى كۇشەيتىلگەن رەجيمدە كۇزەتىلەدى. سونداي-اق, استانا قالاسىنىڭ توڭىرەگىنە بلوك-پوستتار قويىلىپ, ءدىني نىساندار باقىلاۋعا الىندى.