Qazaqstannyń úsh oblysynda jumysshy mamandyqtar arasynda ERG Skills jarysy ótýde

Dástúrge aınalǵan ERG Skills chempıonaty qaıta jastardyń talaptary men kásibı biliktiligin tekseredi. Bul Qazaqstan kolledjderiniń Alıansyna engen oqý oryndary arasyndaǵy kásibı sheberlik baıqaýy. Ol dánekerleý tehnologııasy, slesarlyq is, tokarlyq is, ónerkásiptik avtomatıka jáne elektr montajdaý bes quzyret boıynsha ótip, jumysshy mamandyqtardyń 130-den astam ókilin jınaıdy. 

Bıylǵy jyly kásiptik sheberlik konkýrsyna kolledjder Alıansy men ERG quramyna kirgen elimizdiń úsh oblysynyń ókilderi qatysady. Sonyń ishinde Rýdnyı taý-ken tehnologııalyq kolledji. Osy yntymaqtastyqtyń arqasynda stýdentter oqýdy óndiristegi jumyspen úılestire alady. Mundaı baıqaýlar olardyń daǵdylaryn shyńdaıdy – deıdi kolledj dırektory.

– 2022 jyly ERG jumysshy mamandyqtardy daıyndaıtyn kolledjdermen Alıans qurǵan bolatyn. Aldynda 14 oqý orny bolsa, qazir bul tizimge eńgenderdiń sany 20-ǵa jetti. Qostanaı oblysynan qatysýshylar az emes. Olar: Jetiqara, Lısakovsk, Rýdnyı stýdentteri men 23 jasqa tolmaǵan ERG Service pen KBKB jas mamandary. Bizdiń kolledjdiń qabyrǵasynda tokarlyq is, elektr montajdaý boıynsha jastar synalady, – dedi Rýdnyı taý-ken tehnologııalyq kolledjiniń dırektory Qaısar Qaneshov.

Bizdiń túsirilim toby búgin tokarlardy kórýge asyqty. Jalpy 4 qatysýshy tirkelgen. Onyń ekeýi jastary nebári 18-ge endi tolǵan 2 kýrs stýdentteri. Sheberlik doda 26-27 maýsym aralyǵynda ótpekshi. О́ndiristik oqytý sheberi Iýrıı Gızzatovtyń aıtýynsha saıys bastalmas buryn qatysýshylar kesý quralyn qaıraıdy, jabdyqty baptaıdy jáne jumys syzbalaryn zerdeleıdi.

– Bizdiń bazada alǵash ret osyndaı jarys ótýde. Úlgerimi jaqsy jáne jumysqa jaýapkershilikpen qaraıtyn eki stýdent tańdaldy. Baıqaýda úsh jumys túrin oryndaýǵa 2 kún bólingen. Bul: fýterleý gaıkasy, M42h2 gaıkasy jáne ¾ qubyrlarynyń G shpılkasy bolady. Stýdentter qatty tolqyǵan sııaqty, biraq biz birinshi oryndy alamyz dep senemin. Árıne, bul salada 5 razrıad bar jas mamandarǵa qaraǵanda, bizdiń tájirıbesi az stýdentter sál baıaý oryndaıdy, – deıdi jetekshi Gızzatov.

ERG Skills qatysýshylary sońǵy sátke deıin aldaryna qandaı tapsyrma qoıatynyn bilmedi. Kolledj stýdentteri men jas qyzmetkerler tapsyrmadan bólek, qaýipsizdik tehnıkasyn saqtaý tıis. Ony qadaǵalaıtyn arnaıy ERG sarapshylary shaqyrylǵan. Aıta ketý kerek, baıqaý demeýshileriniń basty maqsattarynyń biri – bolashaq mamandardy kórý. Búgingi tańda kásiporynǵa Rýdnyı taý-ken tehnologııalyq kolledjiniń 80 paıyzdan astam túlekteri jumysqa ornalasqan. Buǵan dálel, qatysýshylardyń biri osy kolledjdiń burynǵy stýdenti bolyp shyqty. Kásiporynda ol bir jyldan astam ýaqyt jumys isteıdi. Ekinshi qatysýshy Artem Kocheýlov KBKB quramyna kiretin «Qazaqstan alıýmınııi» AQ-da 3 jyl qatarynan eńbektenedi.

– Saıys tynysh ótip, eshkim kedergi jasamaýda. Birneshe mınýttan keıin gaıkany aıaqtaımyn. Barlyq úsh jumysty búgin oryndap, erteńge deıin qaldyrmaýǵa nıettimin. Budanda qıyn elementerdi kúndelikti jumysta oryndaımyz. Biz de stýdenttermen qurdaspyz. Jastarǵa umtylýdy, damýdy, mansaptyq ósýdi tileımin, – deıdi tájirbıeli jas maman.

Sheberhananyń buryshynda kók ýnıforma kıgen jas jigitke jaqyndadyq. Ol fýterleý gaıkasyn jasap, tesik burǵylaýmen aınalysyp jatyr.

– Konkýrsta ózimdi synap kórýge bel býdym. Buǵan deıin kásibı sheberlikke de qatysqam, biraq ol jerde 1-2 kýrstar jarysady. Al munda tájirıbeli qyzmetkerlermen betpe-bet kezdesý. Baıqaýdyń aldynda shamamen 2 apta boıy shemalardy, jabdyqtardy, parametrlerdi jáne t.b. zerttedim. Men kúrdeli bólshekten bastap, birtindep jeńilge kóshýdi sheshtim. Árıne, 1 oryn alǵym keledi, – dedi 2 kýrs stýdenti Denıs Pogofonov óz sózinde.

ERG Skills Pavlodar, Qostanaı jáne Aqtóbe oblystarynda ótýde. Baıqaý qorytyndysy boıynsha úzdik jeńimpazdar Qytaı Halyq Respýblıkasynda sheteldik taǵylymdamadan ótedi.

Sánııa SAQTAǴAN