«قازاقتار ايۋ سەكىلدى»: جۋرناليست قازاقستانداعى قىمباتشىلىقتى ءسوز ەتتى

قازاقستان سياقتى وزىندە ەشنارسە وندىرمەيتىن ەلدەردە تۇراتىن ادامداردىڭ ءومىر ساپاسى ەڭبەك ونىمدىلىگىنە بايلانىستى ەمەس. بۇل تۋرالى جۋرناليست ءارى باسپاگەر شىڭعىس مۇقان جەلىدە پىكىر ءبىلدىردى, دەپ حابارلايدى qandastar.kz Skifnews.kz اقپارات پورتالىنا سىلتەمە جاساپ.

ونىڭ پايىمداۋىنشا, دوللاردىڭ تۇراقسىزدىعى ەل ەكونوميكاسىنا اسەر ەتىپ جاتىر.

«قازاقتار ايۋ سەكىلدى… دوللار كەتتى دومالاپ… كەيدە وسى ۆاليۋتاسى تۇراقتى ەلدە تۇرعىڭ كەلەدى. نەگە?

1) سەنىڭ ءومىر ساپاڭ دوللارعا ەمەس, ەڭبەك ونىمدىلىگىڭە بايلانىستى بولادى:

ا) بۇرىن 100 مىڭ تەڭگەگە ءۇش كيىم الساڭ, ەندى ەكى كيىم الاسىڭ;

ءا) بۇرىن ءتورت ءدارى الساڭ, قازىر ۇشەۋىن الاسىڭ;

ب) بۇرىن تەلەديداردى ءبولىپ تولەۋ شارتىمەن 12 ايعا الساڭ, ەندى 18 ايعا الاسىڭ. وسىلاي كەتە بەرەدى, سەبەبى قازاقستان سياقتى وزىندە ەشنارسە وندىرمەيتىن ەلدەردە تۇراتىن ادامداردىڭ ءومىر ساپاسى ەڭبەك ونىمدىلىگىنە بايلانىستى ەمەس.

2) ايلىعىڭ ازايىپ قالادى:

ا) بۇرىن 250 مىڭ تەڭگە ايلىق بىرازعا جەتەتىن سياقتى ەدى, قازىر جەتپەيدى. ايلىعىڭ ازايىپ قالعان جوق, تەڭگەڭ قۇنسىزدانىپ, زاتتار قىمباتتاپ كەتتى;

ءا) ءتىپتى قازاقستاندا شىعاتىن ازىق-ت ۇلىك تە قىمباتتاپ كەتەدى.

بيداي وراتىن تەحنيكا شەتتەن كەلەدى, بيدايدى ۇن ەتىپ, ماكارون شىعارسا, وڭدەيتىن قۇرال-جابدىقتىڭ ءبارى شەتەلدەن ۆاليۋتامەن كەلەدى. ەڭ سوڭىندا, ءوزىڭدى ايۋ سياقتى سەزىنەسىڭ. جازىمەن جۇگىرىپ اڭ اۋلاپ, ءبىراز ماي جيناپ الاسىڭ. ءبىر ۇيىقتاپ تۇرساڭ, تۇگىڭ قالمايدى, ارىپ-اشىپ, كۇنىڭدى ارەڭ كورىپ جۇرەسىڭ نەمەسە قولعا ۇيرەتىلگەن اتجالمان سەكىلدى. شىعىرشىقتا قانشا جۇگىرسەڭ دە, اۋزىڭا تيەتىنى ءبىر ۋىس بيداي. سوندىقتاي دا ويلايسىڭ, ادام ومىرگە ءبىر-اق رەت كەلەدى, اتجالمان سياقتى بوسقا جۇگىرىپ وتكىزگەنشە, ۆاليۋتاسى تۇراقتى ەلدە — تۇراقتى تابىس تاۋىپ جۇرگەن جاقسى ەمەس پە? ولاي ىستەۋ جالپى حالىقتىڭ قولىنان كەلمەيدى. جالپى حالىق نە ىستەمەك?

P.S. الەمگە كوممۋنيزم مەن كاپيتاليزم دەگەن يدەيا بەرىپ, ادامزاتتى جىندى قىلىپ قويعان نەمىستىڭ ەكى ۇلىسى — ماركس پەن ەنەگلس. بەرليندە. بىلتىر بارعانىمدا ادەيى ىزدەپ بارىپ, سۋرەتكە ءتۇستىم», – دەپ جازدى ول Facebook-تەگى پاراقشاسىندا.