قازاقتار رەسەيلىك كوفەحانا جەلىسىنە جاپپاي بويكوت جاريالادى

فوتو: بەسمەديا

قازاقستاندىقتار Smart Coffee كوفەحانالار جەلىسىنە جاپپاي بويكوت جاريالاۋعا كوشتى. بۇعان قاڭتار وقيعاسىنا قاتىستى الەۋمەتتىك جەلىدە تاراعان پىكىر تۇرتكى بولدى, دەپ جازادى qandastar.kz

جەلى قولدانۋشىلارىنىڭ اشۋىن تۋدىرعان جازبا رەسەيلىك كاسىپكەر, اتالعان برەندتىڭ قازاقستانداعى فرانشيزا يەسى ەۆگەني گلينسكيدىڭ اتىنان جاريالانعان. الايدا كاسىپكەر بۇل پىكىردى ءوزى جازباعانىن ايتىپ, كوپشىلىكتەن كەشىرىم سۇراپ, اقتالۋعا كىرىستى, دەپ حابارلايدى Dalanews.kz.

جۇرت نەگە دۇرلىكتى?

رەسەيلىك كاسىپكەر Instagram-داعى ZTB پاراقشاسىنداعى «پۋتين جەڭىستىڭ 80 جىلدىعىنا وراي ۋكراينامەن ۋاقىتشا ءبىتىم جاريالادى» دەگەن جازبانىڭ استىنا “قاڭتار وقيعاسىنا” قاتىستى پىكىر قالدىرعان.

“اتقا ءمىنىپ قارسى الاسىڭدار ما? سەندەر ءتىپتى ەلدەرىڭدە بولعان توڭكەرىستى ءوز بەتتەرىڭشە توقتاتا المادىڭدار, باتىرلار», – دەپ جازعان ول.

بۇل پىكىر كوپشىلىكتىڭ نامىسىنا ءتيىپ, ۇقشۇ اسكەرىنىڭ ارالاسۋى مازاق قىلعان ءسوز رەتىندە قابىلداندى. سكرينشوت Threads جانە وزگە الەۋمەتتىك جەلىلەردە قىزۋ تالقىعا ءتۇستى.

كوپ ۇزاماي جەلى قولدانۋشىلارى 2گيس قوسىمشاسىندا اتالعان برەندكە جاپپاي تومەن باعا قويىپ, الەۋمەتتىك بويكوت جاريالادى.

كاسىپكەردىڭ جاۋابى

كوپشىلىكتىڭ سىنىنا ىلىككەن كاسىپكەر اتالعان جايتتان سوڭ ۆيدەوۇندەۋ جاساپ, ءمان-جايدى ءتۇسىندىرىپ, حالىقتان كەشىرىم سۇرادى.

«بۇگىن تۇنگى 2-دە پاراقشاما شابۋىل باستالدى. بىرەۋ مەنىڭ اتىمنان جازىلعان پىكىردىڭ سكرينشوتىن تاراتتى. مەن ءوزىم باشقۇرتستاندا تۋعانمىن, جارتىلاي باشقۇرت, جارتىلاي تاتارمىن. ءبىزدىڭ حالىقتىڭ مادەنيەتى مەن دۇنيەتانىمى قازاق حالقىنا وتە جاقىن. الگى پىكىر مەنىڭ وزىمە دە اۋىر ءتيدى. ونداي ءسوزدى ەشقاشان جازعان ەمەسپىن», – دەدى ول.

گلينسكيدىڭ ايتۋىنشا, قازاقستانداعى Smart Coffee كومانداسىندا شامامەن 40 ادام جۇمىس ىستەيدى, باسىم بولىگى – قازاقتار.

«مەنىڭ اتىمنان جازىلعان پىكىر ءۇشىن كەشىرىم سۇرايمىن. ول مەنىڭ دە نامىسىما ءتيدى. قاڭتارداعى جارانىڭ قانشالىقتى تەرەڭ ەكەنىن تۇسىنەمىن», – دەدى كاسىپكەر.

سونىمەن قاتار ول جەلىدە تاراعان جازبانىڭ وزىنە تيەسىلى ەمەس ەكەنىن, بىراق ءبارىبىر تۋىنداعان جاعداي ءۇشىن جاۋاپكەرشىلىكتەن قاشپايتىنىن مالىمدەدى.

ايتا كەتەيىك, Smart Coffee قازاقستاندا ءوز-وزىنە قىزمەت كورسەتۋ فورماتىندا جۇمىس ىستەيتدى. ياعني, ۆەندينگ اپپاراتى ارقىلى كوفە ساتۋمەن اينالىسادى.

Kompra.kz دەرەگىنە سۇيەنسەك, «Smart Coffee» اتاۋىمەن تىركەلگەن ەكى كومپانيا بار: ءبىرى – الماتى وبلىسى بورالداي كەنتىندە ورنالاسقان «Smart Coffee» جشس, ەكىنشىسى – الماتىداعى «Smart Coffee LTD». ولار دامير ۆولوح پەن ارتيوم گابدراحمانوۆ ەسىمدى ازاماتتاردىڭ اتىنا تىركەلگەن. كومپانيانىڭ .kz دومەنىندەگى رەسمي سايتى ۋاقىتشا ىستەمەيدى.

گلينسكيدىڭ ءوزى كوفە ارقىلى تابىس تاپقان كاسىپكەر رەتىندە تانىمال. ول ءبىر شىناياق كوفەنى 100 رۋبلگە (شامامەن 500 تەڭگە) ساتىپ, 18 ميلليون رۋبل پايدا تاپقانىن ايتىپ ءجۇر.

ەسكە سالايىق, بيىل قاڭتاردا استاناداعى Qazaq Coffee كوفەحاناسى دا داۋلى پىكىردەن سوڭ جابىلعان بولاتىن. سول كەزدە استانالىق تۇرعىن قايرات يبراەۆ كوفەحانادان قازاقشا ءمازىر سۇراپ, بولماعان سوڭ شاعىمىن 2گيس قوسىمشاسىنا جازعان. وعان اكىمشىلىك قىزمەتكەرى: «قىزمەتكەرلەرىمىز قازاقشا سويلەۋگە مىندەتتى ەمەس», – دەپ جاۋاپ قاتقان. بۇل پىكىر قوعامدا ۇلكەن نارازىلىق تۋعىزىپ, الەۋمەتتىك جەلىدە ۇلت پەن تىلگە دەگەن قۇرمەت ماسەلەسىن قايتا كوتەرگەن ەدى. ناتيجەسىندە, Qazaq Coffee ءوز جۇمىسىن توقتاتتى.