Qazaqtar reseılik kofehana jelisine jappaı boıkot jarııalady

Foto: besmedıa

Qazaqstandyqtar Smart Coffee kofehanalar jelisine jappaı boıkot jarııalaýǵa kóshti. Buǵan Qańtar oqıǵasyna qatysty áleýmettik jelide taraǵan pikir túrtki boldy, dep jazady qandastar.kz

Jeli qoldanýshylarynyń ashýyn týdyrǵan jazba reseılik kásipker, atalǵan brendtiń Qazaqstandaǵy franshıza ıesi Evgenıı Glınskııdiń atynan jarııalanǵan. Alaıda kásipker bul pikirdi ózi jazbaǵanyn aıtyp, kópshilikten keshirim surap, aqtalýǵa kiristi, dep habarlaıdy Dalanews.kz.

Jurt nege dúrlikti?

Reseılik kásipker Instagram-daǵy ZTB paraqshasyndaǵy «Pýtın Jeńistiń 80 jyldyǵyna oraı Ýkraınamen ýaqytsha bitim jarııalady» degen jazbanyń astyna “Qańtar oqıǵasyna” qatysty pikir qaldyrǵan.

“Atqa minip qarsy alasyńdar ma? Sender tipti elderińde bolǵan tóńkeristi óz betterińshe toqtata almadyńdar, batyrlar», – dep jazǵan ol.

Bul pikir kópshiliktiń namysyna tıip, UQShU áskeriniń aralasýy mazaq qylǵan sóz retinde qabyldandy. Skrınshot Threads jáne ózge áleýmettik jelilerde qyzý talqyǵa tústi.

Kóp uzamaı jeli qoldanýshylary 2GIS qosymshasynda atalǵan brendke jappaı tómen baǵa qoıyp, áleýmettik boıkot jarııalady.

Kásipkerdiń jaýaby

Kópshiliktiń synyna ilikken kásipker atalǵan jaıttan soń vıdeoúndeý jasap, mán-jaıdy túsindirip, halyqtan keshirim surady.

«Búgin túngi 2-de paraqshama shabýyl bastaldy. Bireý meniń atymnan jazylǵan pikirdiń skrınshotyn taratty. Men ózim Bashqurtstanda týǵanmyn, jartylaı bashqurt, jartylaı tatarmyn. Bizdiń halyqtyń mádenıeti men dúnıetanymy qazaq halqyna óte jaqyn. Álgi pikir meniń ózime de aýyr tıdi. Ondaı sózdi eshqashan jazǵan emespin», – dedi ol.

Glınskııdiń aıtýynsha, Qazaqstandaǵy Smart Coffee komandasynda shamamen 40 adam jumys isteıdi, basym bóligi – qazaqtar.

«Meniń atymnan jazylǵan pikir úshin keshirim suraımyn. Ol meniń de namysyma tıdi. Qańtardaǵy jaranyń qanshalyqty tereń ekenin túsinemin», – dedi kásipker.

Sonymen qatar ol jelide taraǵan jazbanyń ózine tıesili emes ekenin, biraq báribir týyndaǵan jaǵdaı úshin jaýapkershilikten qashpaıtynyn málimdedi.

Aıta keteıik, Smart Coffee Qazaqstanda óz-ózine qyzmet kórsetý formatynda jumys isteıtdi. Iaǵnı, vendıng apparaty arqyly kofe satýmen aınalysady.

Kompra.kz deregine súıensek, «Smart Coffee» ataýymen tirkelgen eki kompanııa bar: biri – Almaty oblysy Boraldaı kentinde ornalasqan «Smart Coffee» JShS, ekinshisi – Almatydaǵy «Smart Coffee LTD». Olar Damır Voloh pen Artıom Gabdrahmanov esimdi azamattardyń atyna tirkelgen. Kompanııanyń .kz domenindegi resmı saıty ýaqytsha istemeıdi.

Glınskııdiń ózi kofe arqyly tabys tapqan kásipker retinde tanymal. Ol bir shynaıaq kofeni 100 rýblge (shamamen 500 teńge) satyp, 18 mıllıon rýbl paıda tapqanyn aıtyp júr.

Eske salaıyq, bıyl qańtarda Astanadaǵy Qazaq Coffee kofehanasy da daýly pikirden soń jabylǵan bolatyn. Sol kezde astanalyq turǵyn Qaırat Ibraev kofehanadan qazaqsha mázir surap, bolmaǵan soń shaǵymyn 2GIS qosymshasyna jazǵan. Oǵan ákimshilik qyzmetkeri: «Qyzmetkerlerimiz qazaqsha sóıleýge mindetti emes», – dep jaýap qatqan. Bul pikir qoǵamda úlken narazylyq týǵyzyp, áleýmettik jelide ult pen tilge degen qurmet máselesin qaıta kótergen edi. Nátıjesinde, Qazaq Coffee óz jumysyn toqtatty.