«Qazaqtardy qalaı basqarý kerek»: Baspagerdiń otbasyn «baýyzdap ketemiz» dep qaýip tóndirdi

Foto: qaz.ulysmedia.kz

AmalBooks baspasynyń negizin qalaýshy Baqytjan Buqarbaı «Qazaqtardy qalaı basqarý kerek» degen kitaby úshin otbasyna qaýip tóngenin aıtty, dep habarlaıdy bugin.kz portaly Qazaq.today agenttigine silteme jasap.

Baspagerdiń aıtýynsha, kóptegen adam kitapty oqymaı jatyp, taqyryby men muqabasyna qatysty daý kótergen. Kitaptyń ataýyn ózi oılap tappaǵan, tek bar bolǵany 1734 jylǵy muraǵat qujattarynda jazylǵan sózdi taqyryp qylyp alǵan. «Meloman» kitap dúkenderinde bir aıdan asa ýaqyt saltylymda turǵanda qoǵamda rezonans týmaǵan. Tek blogerlerdiń jazbasynan soń, kitaptyń avtoryna qarsy narazylyq týyndaǵan.

«Otbasyńdy bala-shaǵańmen baýyzdap ketemiz degen jazabalar kóp boldy. Bireýler erigip jazdy ma, álde shyn jazdy ma? Ol jaǵyn bilmeımin. Sosyn men amalsyz vıdeo túsirip jarııaladym. Almaty qalalyq PD úıime polıııa patrýlin jiberdi. Biz turatyn úıdi kúzetti. Úrkitip-qorqytýlar kóp boldy. Ashýly adamdar janar-jaǵarmaı beketine kóp keldi. Baqytjan Buqarbaı degen kitaptyń avtory menmin dep, olarmen kezdesip, jeke-jeke túsindirdim. Kóbi kitaptyń mazmunyn oqymaǵan. Tek estigen», – dedi Baqytjan Buqarbaı.

 

Aıtýynsha, ol 2021 jyldan bastap tarıhı kitaptardy shyǵaryp keledi. Buǵan deıin ol tarıhı terekter boıynsha 10 túrli kitapty shyǵarǵan. Olardyń eshqaısysy qoǵamda qarsylyq pikir týdyrmaǵan.

«Maqsatym qazaqqa aǵartýshylyq qyzmet jasaý. Kitap shyǵarý óte qıyn. Iá, tabys tabý bar, biraq ol birinshi orynda emes. Ivan Kırılldiń 1734 jylǵy jazbasyn zerttep, qazaqtardy qalaı basqarý kerektigi týraly zertteýlerin shyǵardyq. Bul kitapty zertteý barysynda kóp eńbektendim. Muqabasyn tańdaýda shalys basyp qoıǵanymyzdy moıyndadyq, syndy qabyldadyq. Satylymnan birden alyp tastadyq. Endi qazir muqabasyn ózgertip qaıta usynamyz. Bul qazirgi saıası ahýaldy sıpattap turǵan joq qoı. Úsh júz jyl buryn jasalǵan ádisteme, sol kezdegi jaǵdaıǵa arnalǵan. Sondyqtan biz tarıhty tanyp bilýge quqylymyz. Patshaıymǵa qazaqty qalaı basqarý keregin Ivan Kırılldiń ózi usynǵan, patshaıym bekitken. taǵyda aıtam, qazirgi jaǵdaıǵa onyń eshqandaı qatysy joq», — dedi kitaptyń avtory.

Baqytjan Buqarbaı aldaǵy ýaqytta ózine, otbasyna qoqan-loqy jasaǵan adamdar týraly zańgermen sóılesken soń sheshim qabyldamaq.