«قازاقتەڭىزكولىكفلوتى كومپانياسى مۇناي تاسىمالداۋدى ارتتىردى

قازاقتەڭىزكولىكفلوتى» كومپانياسى مۇناي تاسىمالداۋ كولەمىن ارتتىردى. بىلتىر وتاندىق كەمەلەر 10 ملن 778 مىڭ توننا قارا التىندى شەتەلگە جەتكىزدى. بۇل, 2022 جىلمەن سالىستىرعاندا 1 ملن 435 مىڭ تونناعا ارتىق كورسەتكىش.

مۇنداي وزگەرىسكە كاسپي تەڭىزى ارقىلى شىعارۋدان بولەك مۇنايدى اشىق تەڭىزدەردە تاسىمالداۋ وڭ ىقپال ەتىپ وتىر. بىلتىر ساۋىردە «اقتاۋ» تانكەرى بورتىنا وتاندىق كەن ورنى وندىرگەن مۇنايدى تيەپ, ازەربايجانعا باعىت الدى. بۇل, باكۋگە 8 جىلدان كەيىنگى العاشقى رەيس. سونداي-اق «قازمۇنايگاز» بەن «شەۆرون» اراسىندا كەلىسسوز جۇرگىزىلدى. ناتيجەسىندە, «قازاقتەڭىزكولىكفلوتى» قولداۋىمەن كاسپي قۇبىر كونسورتسيۋمى ارقىلى نوۆوروسسيسك پورتىنا تەڭىزشەۆرويل مۇنايىن تاسىمالداۋ قولعا الىندى.

ايدار ورجانوۆ, «قازاقتەڭىزكولىكفلوتى» ۇتكقك» جشس باس ديرەكتورى: – كومپانيا مۇنايدى كاسپي, قارا تەڭىز, جەرورتا تەڭىزدەرىندە تاسىمالدايدى. 2023 جىلى «تاراز» جانە «ليۆا» تانكەرىن ساتىپ الدىق. وسىلايشا فلوت كەمەلەرى 15-كە جەتتى. قازىر ولار اقتاۋدان ماحاچكالاعا مۇناي تاسىمالداۋدا. بيىل «اقتاۋ-باكۋ» باعىتىنداعى كەمەلەرگە قوسىمشا جابدىق ورناتىلادى.

«قازمۇنايگاز» ۇلتتىق كومپانياسى مەن Abu Dhabi Ports Group اراسىندا ارىپتەستىك بايلانىس مىعىم. تاراپتار ەلىمىزدە سۋ كولىگىن قۇراستىرىپ, جوندەيتىن كاسىپورنىن قۇرۋعا ۋاعدالاستى.

بيىل كەمە ءوندىرىسىن قۇرۋ مۇمكىندىگىن زەردەلەۋ جۇمىسى باستالماق. كەلىسىم اياسىندا «قازاقتەڭىزكولىكفلوتى» جانە «OFCO Offshore International» كومپانياسىنىڭ ەنشىلەس ۇيىمدارى قازاقستاندىق سۇيرەتكىشتەردى جالعا الۋعا 3 جىلعا كەلىسىمشارت جاساستى. ايدار ورجانوۆ, «قازاقتەڭىزكولىكفلوتى» ۇتكقك» جشس باس ديرەكتورى: – 2023 جىلى 12000 توننالىق ءۇش تانكەر جاساۋعا باستاما كوتەرىلدى. جالپى ەلىمىزدە ساۋدا فلوتى دامۋى ءۇشىن ۆەرف قاجەت.

سوندىقتان ونىڭ قۇرىلىسىن باستاۋدى جوسپارلاپ وتىرمىز. كەمە كاسىپورنىن قۇرۋ تەڭىز كولىگىنە كەشەندى قىزمەت كورسەتۋدى قامتاماسىز ەتپەك. سونداي-اق ءوڭىر ەكونوميكاسىن دامىتىپ, جاڭا جۇمىس ورىندارىن اشۋعا وڭ اسەرىن تيگىزەدى.