«قازاقتىڭ 70 پايىز ءسوزى ارابتىكى»: سىنعا ۇشىراعان يمام سوزدەرىنە تۇسىنىكتەمە بەردى

فوتو: ۆيدەودان سكرين

الەۋمەتتىك جەلىدە تانىمال يمام قابىلبەك ءالىپباي ۇلىنىڭ قازاق ءتىلى مەن اراب تىلىنە قاتىستى ايتقان ءسوزى قىزۋ تالقىعا تۇسكەنى بەلگىلى. كوپشىلىك يمامنىڭ قانداي ماعىنادا ايتپاق بولعانىن تۇسىنبەگەنى انىق. ۆيدەودا يمام اراب ءتىلى قازاق ءتىلىن بۇزباعانىن, قايتا قازاق تىلىندەگى ءسوزدىڭ 70 پايىزى اراب تىلىنەن ەنگەنىن ايتقان بولاتىن. بۇگىن بەلگىلى ۇستاز كوپشىلىكتىڭ الدىنا شىعىپ, ءسوزدىڭ دۇرىس ماعىناسىن ءتۇسىندىردى, دەپ حابارلايدى qandastar.kz Skifnews.kz اقپارات پورتالىنا سىلتەمە جاساپ.

يمامنىڭ ايتۋىنشا, قازاق تىلىنە اراب تىلىنەن قۇلشىلىققا قاتىستى سوزدەر عانا ەنگەن.

«اسسالاۋماعالەيكۇم, قازاق ەلى. قازىر ساپارلاتىپ ءجۇر ەدىم. بىراق مىناۋ الەۋمەتتىك جەلىدە قازاق ءتىلىنىڭ 70% ءسوزى ارابتاردان كىرگەن دەگەن ماسەلە تالقىلانىپ جاتقانىپ كورىپ جاتىرمىن. ونى قولداپ, دۇرىس ماعىنادا تۇسىنۋگە شاقىرىپ جاتقان كىسىلەرگە اللا رازى بولسىن. جالپى ول جەردە مەن قازاق تىلىندە اراب تىلىنەن ەنگەن كىرمە سوزدەردىڭ بار ەكەنىن ايتتىم. سونىڭ ىشىندە ءدىني ءبىلىمىمىز بەن قۇلشىلىق جاساۋىمىزعا قاتىستى ءسوزدىڭ 70%-ى ارابتان ەنگەنىن ايتتىم. ول جەردە مەن وسى تۋرالى مەڭزەگەن ەدىم. جالپىلاما قازاق ءتىلىنىڭ لەكسيكاسىنا قاتىستى ماسەلە ەمەس. ءبىزدىڭ قازاق ءتىلىنىڭ باي ءتىل ەكەنى بەلگىلى. ونى ماقتانىپ ايتىپ جۇرەمىز. مىسالى, ۇستاز, مەشىت, مەدرەسە سەكىلدى ارابتىڭ سوزدەرى قۇلشىلىق جاساۋعا قاتىستى كىرمە ءسوز قاتارىنا ەنگەنىن ايتتىم. ناماز دەگەن ءسوز پارسى تىلىنەن ەنگەن. سول سەكىلدى قۇلشىلىققا قاتىستى كەي سوزدەر تۇرىك تىلىنەن دە ەنگەن. وسىلايشا قۇلشىلىقتا قولدانىپ جۇرگەن ءسوزىمىزدىڭ 70%-ى اراب تىلىنەن ەنگەنىن ايتتىم. قۇرمەتتى قازاق ەلى, سونى دۇرىس تۇسىنۋگە تىرىسامىن. ولاي ءسوزدى بۇرمالاماۋعا شاقىرامىن. ءبىزدىڭ قازاق ءتىلى – وتە باي ءتىل», – دەدى ۇستاز قابىلبەك ءالىپباي ۇلى.