«Qazarnaýlyeksporttyń» eks-dırektory áskerı maqsattaǵy ónimderdi satyp alýǵa bólingen qarjyny jymqyrdy degen aıyppen 11 jylǵa sottaldy

Foto: Arman Ramazanovtyń Facebook paraqshasynan

Qarjy monıtorıngi agenttigi Astanada memlekettik qorǵanys tapsyrysy salasyndaǵy qarajat jymqyrý deregi boıynsha rezonanstyq isti qaraý aıaqtalǵanyn málimdedi, dep jazdy qandastar.kz

Bul týraly Stan.kz aqparat agenttigi habarlaıdy.

Agenttik 2023 jyly Qarjy monıtorıngi agenttigi «Qazarnaýlyeksport» RMK-nyń laýazymdy tulǵalary men teris pıǵyldy jetkizýshiler ustalǵanyn eske saldy. Laýazymdy tulǵalarǵa áskerı maqsattaǵy ónimderdi satyp alýǵa bólingen bıýdjet qarajatyn jymqyrdy jáne sybaılas jemqorlyq derekteri boıynsha aıyp taǵylǵan.

«Memleketke keltirilgen zalal 1,6 mlrd teńgeden asty. Sot úkimimen  «Qazarnaýlyeksport» RMK bas dırektory Ramazanov A.K. 11 jylǵa bas bostandyǵynan aıyryldy, al kásiporynnyń departament dırektory Kýdabaev A.T. 10 jylǵa sottaldy. Qalǵan 9 aıyptalýshy da ártúrli merzimge bas bostandyǵynan aıyryldy.

Sonymen qatar sot memleket paıdasyna 1,6 mlrd teńge kólemindegi azamattyq talap-aryzdy qanaǵattandyryp, jalpy quny 607 mln teńge bolatyn múlikti tárkiledi», – dep málimdedi agenttiktiń resmı ókili Ernar Taıjan.

Úkim zańdy kúshine engen joq.