قازىر اۋىل اكىمدەرى ەشتەڭە شەشپەيدى, ولاردا بەدەل جوق – دەپۋتات

فوتو: Ulysmedia

دەپۋتات اناس باققوجاەۆتىڭ ايتۋىنشا, قازىر اۋىل اكىمدەرىندە ەشقانداي بەدەل جوق, سەبەبى ولار ەشتەڭە شەشپەيدى, دەپ حابارلايدى qandastar.kz Ulysmedia.kz-كە سىلتەمە جاساپ.

جەرگىلىكتى ءوزىن-ءوزى باسقارۋ ماسەلەسى تالقىلانعان ماجىلىستەگى قوعامدىق پالاتا وتىرىسىندا اناس باققوجاەۆ اۋىل اكىمدەرىنىڭ قۇزىرەتى ماسەلەسىن كوتەردى.

– مەنىڭشە, اۋىلداردا ەشتەڭەنى وزگەرتۋدىڭ كەرەگى جوق. قازىر ءبارى جاقسى. نەگە جۇمىس ىستەمەي جاتىر? اكىمدەردەن باستايىق. قازىر اۋىل اكىمدەرىنىڭ بەدەلى جوق. ەشقانداي بەدەلى جوق. «سحودقا» ەشكىم كەلمەيدى دەيدى. اكىمدەر شاقىرادى, ادامدار كەلمەيدى. جينالاتىنى ون-اق ادام. ال اۋىلدا ءبىر اس بەرسىنشى, قۇدايى تاماققا ءبارى جينالادى. نەگە? سەبەبى ول جەردە قىزىق. اڭگىمەلەسەدى, وي بولىسەدى. ءبىر-ءبىرىن تىڭدايدى. تاماعىن جەيدى, سەبەبى پايداسى بار. اكىمدەردىڭ جينالىسىنا كەلمەيدى, ويتكەنى پايداسى جوق. اكىمدەردىڭ بەدەلى دە, قۇزىرەتى جوق. اۋدان اكىمدەرى شاقىرىپ الادى. كۇندە جينالىس. ۆيدەوكونفەرەنتسيا تۇرسا دا, كۇن دە جيىن. كەدەيدىڭ كەڭەسى بىتپەيدى دەيدى. قاشان ول اكىم حالىقپەن جۇمىس ىستەيدى. حالىق ارىزىن جازادى. ال اكىمنىڭ اقشاسى جوق. ول نە شەشەدى? حالىق سول ءۇشىن اكىمگە كەلمەيدى, – دەيدى 0ل.

ونىڭ ايتۋىنشا, اكىمنىڭ قۇزىرەتىن كۇشەيتۋ كەرەك. ماسليحاتقا ءتيىسىپ كەرەگى جوق دەيدى ول.

– ونىڭ دا بىراق بەدەلىن كوتەرۋ كەرەك. بىزدە ورتالىق كومپانيالاردىڭ فيليالى بار. نەگە مەن ونى ماسليحاتپەن كەلىسپەيمىن? فيليال ديرەكتورى بولىپ كىم كەلەدى? ول ءبىزدىڭ ءوڭىردى ويلاي ما? ماسليحاتقا نەگە سول قۇزىرەتتى بەرمەيمىز? ءماسليحاتتىڭ الدىنان ءبىر ءوتۋ كەرەك, – دەيدى ول.

ۇلتتىق ستاتيستيكا بيۋروسىنىڭ مالىمەتى بويىنشا, 1 تامىزدا قازاقستاندا 20 182 003 ادام تۇرادى. 12,6 ميلليوننان استام ادام قالالاردا, ال 7,5 ميلليون ادام اۋىلدى جەرلەردە.