قازمۇنايگاز باسشىسى پرەزيدەنتتىڭ ءموز قىزمەتىنە قاتىستى تاپسىرمالارىن ورىنداۋ ماسەلەسى بويىنشا جيىن وتكىزدى

«قازمۇنايگاز» ۇك اق (بۇدان ءارى – قمگ) باسقارما توراعاسى ماعزۇم مىرزاعاليەۆ شىلدەنىڭ 15-ءى كۇنى مۇناي وڭدەۋ زاۋىتتارىندا ء(موز) جوسپاردان تىس توقتاپ قالۋلار مەن وقىس وقيعالاردى الدىن الۋ جونىندە جيىن وتكىزدى. 

كومپانيا توراعاسى, قمگ مۇناي وڭدەۋ بلوگىنىڭ جانە وتاندىق ءموز باسشىلارى قر پرەزيدەنتى قاسىم-جومارت توقاەۆتىڭ ۇكىمەتتىڭ كەڭەيتىلگەن وتىرىسىندا بەرگەن تاپسىرمالارىن ورىنداۋ ماسەلەلەرىن تالقىلادى.

م.مىرزاعاليەۆ ەل پرەزيدەنتى ءموز قىزمەتىن بىرنەشە رەت سىنعا العانىن اتاپ ايتتى. شىلدەنىڭ 14-ءى كۇنى مەملەكەت باسشىسى ۇكىمەتتىڭ كەڭەيتىلگەن وتىرىسىندا ءموز-دەردەگى جوسپاردان تىس توقتاپ قالۋلاردىڭ سالدارىنان جەكەلەگەن كەزەڭدەردەگى مۇناي ونىمدەرىنىڭ تاپشىلىعى ماسەلەسىنە توقتالدى.

«زاۋىتتار مەنەدجمەنتى ءوندىرىس پروتسەسىنىڭ كۇردەلىلىگىنە جانە كەز كەلگەن وندىرىستە سياقتى شتاتتان تىس جاعدايداردىڭ ساقتالىپ وتىرعان قاۋىپىنە قاراماستان, وقىس وقيعالار ءۇشىن قاشاندا جاۋاپتى بولادى. مۇناي وڭدەۋ زاۋىتتارىنىڭ باسشىلارى بۇل ماسەلەنى ۇنەمى قاتاڭ باقىلاۋدا ۇستاپ, قانداي دا ءبىر قاۋىپ-قاتەر كەزىندە شۇعىل تۇردە ءتيىستى شارالار قابىلداۋعا ءتيىس», – دەدى ۇلتتىق كومپانيا باسشىسى.

اتىراۋ, شىمكەنت جانە پاۆلودار مۇناي وڭدەۋ زاۋىتتارىنىڭ باسشىلارى وقىس وقيعالاردى الدىن الۋ جانە جابدىقتىڭ بەرىكتىگىن ارتتىرۋ بويىنشا قولعا الىنعان شارالار تۋرالى ەسەپ بەردى. سونىمەن قاتار زاۋىتتار مەنەدجمەنتى قمگ باسشىلىعىنا 2020-2021 جىلدارى جانە 2022 جىلدىڭ ءبىرىنشى جارتىجىلدىعىندا وندىرىستە بولعان وقىس وقيعالار مەن توقتاپ قالۋلاردىڭ تالداۋىن ۇسىندى. ولاردىڭ بەرگەن مالىمەتى بويىنشا, 2020-2021 جىلدارى بارلىق ءۇش ءموز-دە توقتاپ قالۋدىڭ 401 فاكتىسى تىركەلگەن: ءاموز-دە 341, ونىڭ 60-ى وقىس وقيعا, پمحز – 13, ونىڭ 10 وقىس وقيعا, پقوپ-تا – 47, ونىڭ 11-ءى وقىس وقيعا. تالداۋدا ءموز-دەردىڭ جوسپارلى توقتاپ قالۋلارى ەسەپكە الىنبادى.

جيىن سوڭىندا مۇناي وڭدەۋ زاۋىتتارىنىڭ تۇراقتى جۇمىسىن ارتتىرۋ ءۇشىن شارالاردى كۇشەيتۋ بويىنشا شەشىمدەر قابىلداندى جانە ۇسىنىستار ەنگىزىلدى. بۇدان بولەك, ءموز-دەر ءۇشىن ساتىپ الۋ ەرەجەلەرىن جەتىلدىرۋدى جالعاستىرۋ, سونداي-اق قويمادا قوسالقى بولشەكتەر مەن شىعىن ماتەريالدار قورىنىڭ كەپىلدىكتى رەزەرۆىن قامتاماسىز ەتۋ قاجەتتىلىگى اتاپ ءوتىلدى.

انىقتاما:
وقىس وقيعا دەگەنىمىز كاسىپورىن جۇمىسىنىڭ ىشكى سەبەپتەرىنە بايلانىستى بولعان شتاتتان تىس وقيعا. ول ءوندىرىس جوسپارىنىڭ ورتاشا ايلىق ورىندالۋىنا كەرى اسەر ەتەدى.