جاڭالىقتار
قازمۇنايگاز «وزەنمۇنايگاز» جۇمىسشىلارىنىڭ تالابىنا قاتىستى تۇسىنىكتەمە بەردى
فوتو: اشىق دەرەككوز
قازمۇنايگاز جاڭاوزەندەگى جاعدايدى ءجىتى باقىلاپ وتىر جانە بۇدان بۇرىن «وزەنمۇنايگاز» كومپانياسىنا قاراستى بۇرعىلاۋ جۇمىستارى باسقارماسى جۇمىسشىلارىنىڭ ءار تالابى بويىنشا ناقتى تۇسىنىكتەمە بەرگەن بولاتىن, دەپ جازدى qandastar.kz
ءبىرىنشى كۇندەرى رۇقساتسىز اكتسياعا 1 700 ادام قاتىسقان. بىراق ءتۇسىندىرۋ ءىس-شارالارىنان كەيىن جۇمىسشىلاردىڭ باسىم بولىگى جۇمىس ورىندارىنا ورالدى. بۇگىندە 281 جۇمىسشى جالعان اقپاراتقا نەگىزدەلگەن تالاپ قويىپ, جۇمىسقا شىعۋدان باس تارتىپ وتىر.
2021 جىلدان باستاپ جانە بيىلعى 10 ايدىڭ قورىتىندىسى بويىنشا وزەنمۇنايگازعا 1978 ادام جۇمىسقا قابىلدانىپ, سونىڭ 199-ى بۇرعىلاۋ جۇمىستارى باسقارماسىنا ورنالاستى.
جالپى, كومپانيادا جاقسى جاعداي جاسالعان, ءبىر قىزمەتكەرگە كورسەتىلەتىن الەۋمەتتىك قولداۋ مولشەرى — ەڭ جوعارى كورسەتكىشتەردىڭ ءبىرى.
وزەنمۇنايگازدىڭ قازىرگى ۇجىمدىق شارتى بيىل 25 ساۋىردە ومگ مەن ءۇش كاسىپوداق اراسىندا قابىلدانىپ, الەۋمەتتىك قولداۋ سوماسى تاعى شامامەن 9 ملرد تەڭگەگە ۇلعايتىلدى. سونىمەن قاتار ومگ جۇمىسشىلارىنىڭ جالاقىسىنا جىل سايىن يندەكساتسيا جۇرگىزىلەدى. 2022 جىلى قىزمەتكەرلەردىڭ جالاقىسى 30%-عا, 2023 جىلى 9,5%-عا, بيىل 8%-عا كوتەرىلدى.
ۇجىمدىق شارتتا الەۋمەتتىك قولداۋدىڭ 40-تان استام ءتۇرى كوزدەلگەن: مەملەكەتتىك, ۇلتتىق جانە كاسىبي مەرەكەلەرگە ارنالعان سىياقى, باسپانا ساتىپ الۋ مەن كەڭەيتۋگە جەڭىلدىكپەن نەسيە بەرۋ, مەديتسينالىق قىزمەت كورسەتۋ, جىل سايىن شيپاجايلارعا 2500 جولداما بولىنەدى, ومگ قىزمەتكەرلەرىنىڭ شامامەن 4500 بالاسى بالالار-ساۋىقتىرۋ لاگەرىنە جىبەرىلەدى, اي سايىن بالاباقشا اقىسى وتەلەدى, قىزمەتكەرلەر بالالارىنىڭ وقۋ ۇلگەرىمىنە قاراي جوعارى وقۋ ورىندارىندا وقىتۋ ءۇشىن قاراجات كوزدەلگەن. سونداي-اق نەكە قيۋ كەزىندە جانە باسقا دا جەڭىلدىكتەر قاراستىرىلعان.
ايتا كەتسەك, بۇگىندە وزەنمۇنايگاز ءوندىرۋ جوسپارىنان قالىپ كەلە جاتىر. جوسپارلى كورسەتكىشتەردىڭ ورىندالماۋى كومپانيانىڭ قارجىلىق جاعدايىنا اسەر ەتەتىن بولادى. وسىعان بايلانىستى, بۇرعىلاۋ جۇمىستارى باسقارماسىنىڭ ماماندارىن جۇمىسقا شىعۋعا شاقىرامىز. سونداي-اق, ەل زاڭدارىن ساقتاۋ قاجەت ەكەنىن ەسكە سالامىز.
تالاپ قويىلعان كۇننەن باستاپ بۇرعىلاۋ جۇمىستارى باسقارماسىنىڭ جۇمىسشىلارىمەن وزەنمۇنايگاز باسشىلىعى كەلىسسوز جۇرگىزىپ جاتىر.
