QazMunaıGaz «О́zenmunaıgaz» jumysshylarynyń talabyna qatysty túsinikteme berdi

Foto: ashyq derekkóz

QazMunaıGaz Jańaózendegi jaǵdaıdy jiti baqylap otyr jáne budan buryn «О́zenmunaıgaz» kompanııasyna qarasty Burǵylaý jumystary basqarmasy jumysshylarynyń ár talaby boıynsha naqty túsinikteme bergen bolatyn, dep jazdy qandastar.kz

Birinshi kúnderi ruqsatsyz akııaǵa 1 700 adam qatysqan. Biraq túsindirý is-sharalarynan keıin jumysshylardyń basym bóligi jumys oryndaryna oraldy. Búginde 281 jumysshy jalǵan aqparatqa negizdelgen talap qoıyp, jumysqa shyǵýdan bas tartyp otyr.

2021 jyldan bastap jáne bıylǵy 10 aıdyń qorytyndysy boıynsha О́zenmunaıgazǵa 1978 adam jumysqa qabyldanyp, sonyń 199-y Burǵylaý jumystary basqarmasyna ornalasty.

Jalpy, kompanııada jaqsy jaǵdaı jasalǵan, bir qyzmetkerge kórsetiletin áleýmettik qoldaý mólsheri — eń joǵary kórsetkishterdiń biri.

О́zenmunaıgazdyń qazirgi ujymdyq sharty bıyl 25 sáýirde О́MG men úsh kásipodaq arasynda qabyldanyp, áleýmettik qoldaý somasy taǵy shamamen 9 mlrd teńgege ulǵaıtyldy. Sonymen qatar О́MG jumysshylarynyń jalaqysyna jyl saıyn ındeksaııa júrgiziledi. 2022 jyly qyzmetkerlerdiń jalaqysy 30%-ǵa, 2023 jyly 9,5%-ǵa, bıyl 8%-ǵa kóterildi.

Ujymdyq shartta áleýmettik qoldaýdyń 40-tan astam túri kózdelgen: memlekettik, ulttyq jáne kásibı merekelerge arnalǵan syıaqy, baspana satyp alý men keńeıtýge jeńildikpen nesıe berý, medıınalyq qyzmet kórsetý, jyl saıyn shıpajaılarǵa 2500 joldama bólinedi, О́MG qyzmetkerleriniń shamamen 4500 balasy balalar-saýyqtyrý lagerine jiberiledi, aı saıyn balabaqsha aqysy óteledi, qyzmetkerler balalarynyń oqý úlgerimine qaraı joǵary oqý oryndarynda oqytý úshin qarajat kózdelgen. Sondaı-aq neke qııý kezinde jáne basqa da jeńildikter qarastyrylǵan.

Aıta ketsek, búginde О́zenmunaıgaz óndirý josparynan qalyp kele jatyr. Josparly kórsetkishterdiń oryndalmaýy kompanııanyń qarjylyq jaǵdaıyna áser etetin bolady. Osyǵan baılanysty, burǵylaý jumystary basqarmasynyń mamandaryn jumysqa shyǵýǵa shaqyramyz. Sondaı-aq, el zańdaryn saqtaý qajet ekenin eske salamyz.

Talap qoıylǵan kúnnen bastap burǵylaý jumystary basqarmasynyń jumysshylarymen О́zenmunaıgaz basshylyǵy kelissóz júrgizip jatyr.