«KAZSAT-3R» جەر سەرىگى ۇشىرىلۋى مۇمكىن

«KazSat-2» جەرسەرىگىن پايدالانۋ مەرزىمى وسى جىلى اياقتالادى دەگەن اقپارات شىندىققا جاناسپايدى. بۇل تۋرالى رەسپۋبليكالىق عارىشتىق بايلانىس ورتالىعىنىڭ قىزمەتكەرلەرى حابارلادى.

مامانداردىڭ سوزىنە سۇيەنسەك, «KazSat» ۇلگىسىندەگى وتاندىق جەر سەرىكتەرىنىڭ تەحنيكالىق مۇمكىندىگى ءالى بىرنەشە جىلعا جەتەدى. بۇل – اقكول قالاسىنداعى عارىشتىق بايلانىس ورتالىعى. وتاندىق جەر سەرىكتەرى وسى جەردەن باسقارىلادى. جالپى «KazSat-2» جاساندى جەر سەرىگىنىڭ وربيتاعا جىبەرىلگەنىنە بيىل 13 جىل. نۇركەن يسمايلوۆ, عارىشتىق بايلانىس ورتالىعىنىڭ جەتەكشى ينجەنەرى: — ماقتانىش, ارينە, بار. ويتكەنى كوپ ەلدە مۇنداي عارىش اپپاراتتارى جوق.

بىزدە, مىسالى, بىرەۋ ەمەس, 2 عارىش اپپاراتىمىز بار. تاعى دا بولادى دەگەن ۇمىتتەمىز. الىستاعى نەمەسە تاۋدا ورنالاسقان كوپ بايلانىس ءتۇرى جەتە قويمايتىن اۋىلدارعا عارىشتىق بايلانىس بەرەمىز. تەلەۆيدەنيە بەرەمىز. اقكولمەن قاتار الماتى وبلىسىنىڭ كوكتەرەك اۋىلىندا دا باسقارۋ كەشەنى بار. ولاردىڭ جۇمىسى قازاقستانمەن بىرگە ورتالىق ازيانى قامتيدى. بۇگىندە «Kazsat» عارىشتىق بايلانىس جانە حابار تاراتۋ جۇيەسىندە KazSat-2 جانە KazSat-3 جاساندى جەر سەرىكتەرى قىزمەت ەتەدى. ميرلان التىنبەك, ءتىلشى: — بۇگىندە زاماناۋي عارىش تەحنولوگيالارى بارلىق سالادا قولدانىلادى. اتاپ ايتساق, جەردى قاشىقتان زوندتاۋ, عارىش مونيتورينگى تاعى بار. وسىعان دەيىن وپتيكالىق قۇرىلعىلار پايدالانىلىپ كەلسە, الداعى ۋاقىتتا رادارلىق اپپاراتتار جۇيەگە ەنگىزىلۋى مۇمكىن. بۇل تۋرالى ايدىن ايىمبەتوۆ جىل باسىندا «قازاقستان-جاپونيا» بيزنەس فورۋمىندا تىلگە تيەك ەتتى. ۇلتتىق عارىش ورتالىعى باسقارماسىنىڭ توراعاسى ايدىن ايىمبەتوۆ رادارلىق تەحنولوگيانىڭ ارتىقشىلىعىن ايتىپ, قانداي سالالاردا پايداعا جارايتىنىن ءتۇسىندىردى.

ايدىن ايىمبەتوۆ, «قازاقستان عارىش ساپارى» ۇك» اق باسقارما توراعاسى: — وپتيكالىق قۇرىلعى تەك كۇندىز جانە اسپان اشىق كەزدە جۇمىس ىستەي السا, رادارلىق جۇيەگە تۇنگى ۋاقىت پەن بۇلتتى اۋا رايى كەدەرگى ەمەس. راديويمپۋلس ارقىلى قىزمەت ەتەدى.  وكىنىشكە قاراي, قازىر ەلىمىزدىڭ سۋ ارنالارى مەن سۋ قويمالارىنىڭ توزىعى جەتكەن. وزەندەر مەن كولدەردى, اعىستاردى, سۋدىڭ تابيعي ءارى جاساندى باعىتتارىن, بۋلانۋىن جانە اۋىل شارۋاشىلىعىندا قولدانۋ مولشەرىن عارىش مونيتورينگى ارقىلى باقىلاي الامىز. الداعى ۋاقىتتا «KazSat-3R» جەر سەرىگى ۇشىرىلۋى مۇمكىن. بىراق ول ءۇشىن «بايقوڭىر» عارىش ايلاعىن جاڭعىرتۋ كەرەك, – دەيدى سەنات دەپۋتاتتارى. عالياسقار سارىباەۆ, قر پارلامەنتى سەناتىنىڭ دەپۋتاتى: — كەيىنگى جىلدارى «بايقوڭىر» عارىش ايلاعىندا كوممەرتسيالىق ۇشۋلار توقتادى. سونىڭ سالدارىنان سۇرانىس تومەندەدى. وسى كەشەننىڭ قابىلەتتىلىگىن ساقتاپ قالۋ, جۇمىس ورىندارىن قۇرۋ جانە ۇلتتىق ماماندار كورپۋسىن قالىپتاستىرۋ ماقساتىندا «بايتەرەك» جوباسىن ىسكە اسىرۋدى جالعاستىرۋ قاجەت. اەروعارىش جوبالارىنىڭ ۇزاق مەرزىمدەرى, قارجىلاندىرۋدىڭ جەتكىلىكسىزدىگى كادرلاردىڭ باسقا سالاعا اۋىسۋىنا جانە شەتەلدەرگە جاپپاي كەتۋىنە اكەلىپ وتىر.

سەناتوردىڭ ايتۋىنشا, قازاقستان عارىشتىق الەۋەتىن تولىق پايدالانباي وتىر. بولىنەتىن قارجى دا جىل وتكەن سايىن قىسقارىپ, سالا قۇردىمعا كەتۋگە جاقىن. كەيىنگى ونجىلدىقتا اەروعارىش سالاسىن دامىتۋ بويىنشا ءبىر دە ءبىر مەملەكەتتىك باعدارلاما قابىلدانباعان. بۇلاي جالعاسا بەرسە, «KazSat-3R» جاساندى جەرسەرىگىن ۇشىرۋ توقتاپ قالۋى عاجاپ ەمەس, – دەيدى عالياسقار سارىباەۆ. جوسپار بويىنشا «KazSat-2» 2026 جىلعا دەيىن, ال «KazSat-3» 2029 جىلعا دەيىن جۇمىس ىستەيدى.