Keı qazaqstandyqtardyń nesıesi keshirilmek: Ol úshin jańa erejege sáıkes ne isteý kerek

Foto: Stan.kz

Qazaqstanda boryshkerlerdiń nesıe berý sharttaryn qaıta qaraýǵa múmkindik beretin jańa erejeler ázirlendi. Qarjy naryǵyn retteý jáne damytý agenttigi ujymdyq qaıta qurylymdaý mehanızmin engizýdi usyndy, dep jazdy qandastar.kz

Bul mehanızm arqyly qaryzdardy biriktirýge, aıyppuldar men komıssııalardy alyp tastaýǵa, qaryz somasyn azaıtýǵa nemese múldem keshirýge múmkindik beriledi. Bul týraly Stan.kz aqparat agenttigi habarlaıdy.

Kimderge jeńildik jasalady?

Qaıta qurylymdaýǵa kelesi sharttardyń barlyǵyna sáıkes keletin azamattar júgine alady:

• Bankter men mıkroqarjy uıymdarynda eki nemese odan da kóp kepilsiz qaryzy bar;
• nesıe boıynsha alty aıdan astam nemese mıkronesıeler boıynsha úsh aıdan astam merzimi ótken tólemderi bar;
• Páter nemese kólik sııaqty kepilge qoıylǵan basqa nesıeleri joq;
• Jalpy bereshek somasy 1 600 AEK-ten (shamamen 6,3 mln teńge) aspaıtyn.

Mundaı jaǵdaıda azamat ujymdyq qaıta qurylymdaýǵa ótinish bere alady. Nátıjesinde nesıe berýshi birlesken sheshim qabyldap, tólem kestesin qaıta qaraıdy. Aıyppul men ósimpuldy tolyq alyp tastaıdy. Sonymen qatar 6 aıǵa deıingi merzimge tólemdi shegerý múmkindigin qarastyrady.

Qaryz qashan azaıtylady nemese keshiriledi?

Myna jaǵdaıda qaryz tolyq keshiriledi:

• Qaryz alaıaqtar arqyly rásimdelgen bolsa;
• Qaryz alýshynyń jaǵdaıy qujat júzinde rastalǵan aýyr ómirlik jaǵdaılarmen baılanysty bolsa;
• Qaryzdy óteýge obektıvti sebeptermen qabiletsiz ekeni barlyq nesıe berýshi tarapynan tanylsa.

Mundaı jaǵdaıda bank mindetti túrde ótinishti qarap, qaryzdy azaıtý, paıyzdardy alyp tastaý nemese tólem kestesin ózgertý sııaqty sheshimder usynýy tıis.

Qandaı áreketter alaıaqtyq dep esepteledi?

Eger nesıe erkińizden tys rásimdelip, qarajat úshinshi tulǵalardyń shotyna aýdarylǵan bolsa jáne tergeý sizdiń alaıaqtyqtyń qurbany bolǵanyńyzdy rastasa bank qaryzdy óndirýdi toqtatyp, tipti ony joıýy múmkin. Ol úshin kelesi sharttardyń biri bolýy qajet:

• Sizdi jábirlenýshi dep taný týraly qaýly bolýy;
• Qarajattyń basqa adamdardyń shotyna aýdarylǵany;
• Bank dybystyq rastaýdy júrgizbegen jáne kúdikti tranzakııaǵa tosqaýyl qoımaǵany.

Qalaı ótinish berýge bolady?

Qaryz alýshy bankke nemese mıkroqarjy uıymyna jazbasha ótinishpen júgine alady. Bul jaǵdaıda:

• Bank ótinishti qabyldap, tirkeýge mindetti;
• О́tinish 15 kúntizbelik kún ishinde qaralady;
• Qaraý kezeńinde bank sotqa bere almaıdy jáne qaryzdy kollektorlarǵa ótkize almaıdy;
• Qanaǵattandyrylmaǵan jaǵdaıda bank jazbasha túrde bas tartý sebebin túsindirýi tıis.

Qosymsha kepildikter

• Eger eki jyl ishinde bank naqty qaıta qurylymdaýdy usynbasa jáne aıyppuldar men ósimpuldardy joımasa, ol qaryzdy kollektorlyq agenttikke bere almaıdy.
• Bankter veb-saıttarynda qaralǵan ótinishter men qabyldanǵan sharalar týraly aqparatty jarııalaýǵa mindetti.
• Jappaı buzýshylyqtar bolǵan jaǵdaıda bank bereshekti azaıtýdyń jeke josparyn jasap, ony ýákiletti organmen kelisýi kerek.

Jańa ereje qaryzdardy avtomatty túrde keshirý emes, biraq nesıe berýshilermen mámilege kelýdiń naqty múmkindigi. Eń bastysy ótinishti ýaqytynda berip, jaǵdaıyńyzdy qujatpen rastańyz. Alaıaqtardyń qurbany bolǵandar nemese qıyn jaǵdaıǵa tap bolǵandar úshin bul qarjylyq turaqtylyqty qalpyna keltirýge múmkindik beredi.

Aıta keteıik, buǵan deıin Mıkronesıesi kóp qazaqstandyqtar qaryzdaryn biriktirýge múmkindik alatyny týraly jazǵan edik.