كەيبىر قازاق جاستارى ارابتاردىڭ اياعىن ءسۇيىپ ءجۇر – نۇرلان يمام

فوتو: اشىق دەرەككوز

استاناداعى رىسكەلدى قاجى اتىنداعى مەشىتتىڭ باس يمامى, بەلگىلى تەولوگ نۇرلان بايجىگىت ۇلى Qasqa Jol YouTube ارناسىنا بەرگەن سۇحباتىندا قارا جامىلىپ جۇرەتىندەردى سىناپ تاستادى, دەپ حابارلايدى qandastar.kz Politico.kz سايتىنا سىلتەمە جاساپ. 

نۇرلان يمام ءوز سوزىندە قازىر كەيبىر جاستار ارابتاردىڭ قول-اياعىن ءسۇيىپ جۇرگەنىن ايتتى.

قازاق ىلەسپە حالىقپىز. ەرىپ كەتە بەرەمىز. اسىرەسە, قينالعان ساتتە بىرەۋ بىزگە كەلىپ, باعىت-باعدار بەرسە, سونىڭ ايتقانىمەن ءجۇرىپ كەتەمىز. اتا-بابالارىمىزدىڭ كۇندەلىكتى ءومىرى ديالەكتىمىزگە, سۇيەگىمىزگە ءسىڭىپ كەتكەن. «ءالىپتى تاياق دەپ تانىمايدى» دەگەن ءسوز دە سولاردان كەلگەن. بۇل – ءبىزدىڭ بولمىس. اراب بولىپ كەتكەن جوق. كيىمىمەن, شەكپەنىمەن, ەلدى-جەردى ساقتاپ قالدى. ۇلتقا, ەلگە دەگەن ماحاببات ءبىر جەرگە جينالىپ تۇردى. ءدىن رۋحانياتتانىپ تۇردى. بۇرىلىپ, ارابتى ءسۇي دەگەن جوق. قازىر كەيبىر جاستار ارابتاردىڭ قولىن, اياعىن ءسۇيىپ ءجۇر. ەلىڭدى ءسۇي, جەرىڭدى ءسۇي, دالانىڭ جۋسانىن ءسۇي, سول ارتىعىراق, – دەدى ول.

نۇرلان بايجىگىت ۇلى سونداي-اق قازاقستان يسلام مەملەكەتى ەمەس ەكەنىن, سول سەبەپتى قارا كيىنۋگە قارسى ەكەنىن اشىپ ايتتى.

بىلەسىز بە, تمد ەلدەرىنىڭ ىشىندە ءبىزدىڭ مەملەكەت قانا قىز-كەلىنشەكتەرگە ورامالمەن تولقۇجاتقا تۇسۋگە رۇقسات بەرگەن. بۇل – كونستيتۋتسيالىق قۇقىعىن ەركىن قورعاعان مەملەكەت دەگەن ءسوز. ءبىزدىڭ ەلدە قارا كيىنگەندەردى جۇرگىزبەك تۇگىلى, قۇشاقتاپ جاتقىزسا دا, قابىلدامايمىز. مەن ءوزىم قازاقستاننىڭ ازاماتى رەتىندە قابىلدامايمىن. قارا كيىنۋگە قارسىمىن. ءبىز – زايىرلى مەملەكەتپىز, يسلام مەملەكەتى ەمەسپىز, – دەپ سىنادى نۇرلان بايجىگىت ۇلى.