ءبىلىم
كەلەر جىلى قولدانىسقا ەنەتىن وقۋلىقتاردىڭ جوباسى تالقىلاۋعا شىعارىلدى
فوتو: Halyq Uni
2025-2026 وقۋ جىلىندا قولدانىسقا ەنگىزىلەتىن 4-سىنىپتارعا ارنالعان وقۋلىقتار قوعامدىق تالقىلاۋعا شىعارىلدى, دەپ حابارلايدى qandastar.kz Halyq Uni-نە سىلتەمە جاساپ.
تالقىلاۋعا قاتىسۋ ءۇشىن ءبىلىم مازمۇنىن ساراپتاۋ ورتالىعىنىڭ https://bmso.kz سايتىنداعى «وقۋ ادەبيەتتەرىن قوعامدىق تالقىلاۋ» بولىمىنە ءوتۋ كەرەك. وندا كەلەسى پاندەر بويىنشا وقۋلىقتاردىڭ مازمۇنىمەن تانىسۋعا بولادى: «ورىس ءتىلى» (وقىتۋ قازاق تىلىندە جۇرگىزىلەتىن مەكتەپتەر ءۇشىن); «ەڭبەككە باۋلۋ», «بەينەلەۋ ونەرى», شەت تىلدەرى (اعىلشىن, نەمىس, فرانتسۋز), سونداي-اق «تسيفرلىق ساۋاتتىلىق» بويىنشا ەلەكتروندى وقۋلىق نۇسقالارى.
وقۋ-اعارتۋ مينيسترلىگى تالقىلاۋعا مۇعالىمدەر, اتا-انالار, قوعامدىق ۇيىمداردىڭ وكىلدەرى مەن مەكتەپ وقۋلىقتارىنىڭ ساپاسىنا بەي-جاي قارامايتىن بارلىق ازاماتتار قاتىسا الاتىنىن جەتكىزدى. بارلىق كەلىپ تۇسكەن سىن-ەسكەرتپەلەر, مەن وقۋلىقتاردىڭ ساپاسى مەن مازمۇنىن جاقسارتۋعا قاتىستى ۇسىنىستار ساراپتاما بارىسىندا ەسكەرىلەدى. تالقىلاۋ 30 قىركۇيەككە دەيىن جالعاسادى.
اتاپ ءوتۋ كەرەك, قولدانىستاعى زاڭناما بويىنشا بۇگىندە وقۋلىقتار ساراپتامانىڭ بەس كەزەڭىنەن وتەدى: عىلىمي-پەداگوگيكالىق ساراپتاما, وقۋلىقتاردى پيلوتتىق مەكتەپتەردە سىناقتان وتكىزۋ, قوعامدىق-پەداگوگيكالىق تالقىلاۋ, پاندىك ساراپتالىق كوميسسيانىڭ قاراۋى. قازىرگى ۋاقىتتا اتالعان وقۋلىقتار قوعامدىق تالقىلاۋمەن قاتار, ەلىمىزدىڭ بىرنەشە وڭىرلەرىندە 31 پيلوتتىق مەكتەپتە سىناقتان ءوتىپ جاتىر. عىلىمي-پەداگوگيكالىق ساراپتاماعا عالىمدار مەن بىلىكتىلىك ساناتى «زەرتتەۋشى پەداگوگتەن» تومەن ەمەس پراكتيك-مۇعالىمدەر تارتىلادى. ساراپشىلار ارنايى وقۋ كۋرسىنان ءوتىپ, ساراپشى سەرتيفيكاتىن العان جانە رەسپۋبليكالىق ساراپشىلار بازاسىنا ەنگەن. وسىنداي جوعارى تالاپتار سىناق جانە پاندىك ساراپتالىق كوميسسيا قاتىسۋشىلارىنا دا قويىلادى, – دەلىنگەن مينيسترلىك حابارلاماسىندا.
پاندىك ساراپتاما كوميسسياسىنىڭ شەشىمىمەن ساراپتامانىڭ بارلىق كەزەڭدەرىنەن وتكەن وقۋلىقتار مەكتەپتەردە پايدالانۋ ءۇشىن جانە مينيسترلىك بەكىتەتىن وقۋلىقتار تىزبەسىنە ەنگىزۋ ءۇشىن ۇسىنىلادى.
