«كەلەشەك ۇرپاقتىڭ باتىرى سەن بولۋىڭ كەرەك» — GGG جانىبەك الىمحان ۇلىمەن كەزدەسىپ, قولداۋ ءبىلدىردى

ورتا سالماقتا WBO جانە IBF تۇجىرىمدارى بويىنشا الەم چەمپيونى, قازاقستاندىق بوكسشى جانىبەك ءالىمحان ۇلى ءوزىنىڭ اتى اڭىزعا اينالعان جەرلەسى گەننادي گولوۆكينمەن كەزدەسۋىنەن ۆيدەو جاريالادى. بۇل تۋرالى Qandastar.kz حابارلايدى

نەگىزى ءالىمحان ۇلى مەن GGG-ءدىڭ جۇزدەسۋى ءساۋىر ايىندا وتكەن, سول كەزدە «قازاق ءستيلى» الەۋمەتتىك جەلىدەگى پاراقشاسىندا «اعاممەن بۇگىنگى جارقىن كەزدەسۋ» دەپ جازىپ, گولوۆكيندى بەلگىلەگەن ەدى. الايدا جۇزدەسۋدىڭ بەينەجازباسى بۇگىن جاريالاندى.

كەزدەسۋ بارىسىندا گولوۆكين ءىزباسارىنا ۇلكەن سەنىم ارتىپ:

«ەلىمىز قازىر ناعىز باتىرلارعا مۇقتاج. جاكۇيەرلەردى تاڭەرتەڭ ەرتە ۇيقىسىنان وياتاتىن بۋىننىڭ ءبىرى مەن بولسام, سەن – كەلەسى بۋىنسىڭ. سەن ءبارىن باعىندىرا الاسىڭ. كەلەشەك ۇرپاقتىڭ باتىرى سەن بولۋىڭ كەرەك», – دەدى ول.

ەسكە سالساق, بيىل استانادا وتكەن بوكس كەشىندە جانىبەك ءالىمحان ۇلى IBF جانە WBO چەمپيوندىق بەلبەۋلەرىن كەزەكتى رەت قورعاپ, فرانتسۋز انۋاەل نگاميسسەنگەنى بەسىنشى راۋندتا نوكاۋتپەن جەڭگەن بولاتىن.

ال گەننادي گولوۆكين قازىرگى ۋاقىتتا قر ۇلتتىق وليمپيادالىق كوميتەتىنىڭ پرەزيدەنتى جانە World Boxing ۇيىمىنىڭ وليمپيادالىق كوميسسياسىنىڭ توراعاسى قىزمەتىن اتقارىپ ءجۇر. دەگەنمەن ول كاسىبي مانسابىن اياقتاعانى جونىندە رەسمي مالىمدەمە جاساعان جوق.