«كەلەتىن سۋدىڭ مولشەرى كوبەيەدى ەكەن دەپ ۇمىتتەنۋدىڭ قاجەتى جوق» — ساراپشى كاسپي تۋراسىندا

فوتو: Dalanews

ساراپشىلار كاسپي تەڭىزىنە قاتىستى دابىل قاعىپ وتىر, دەپ حابارلايدى qandastar.kz Dalanews.kz-كە سىلتەمە جاساپ.

24.kz مالىمەتىنە سۇيەنسەك, بەس مەملەكەتكە ورتاق تەڭىزدىڭ قازاقستاندىق بولىگىندە جاعالاۋ سىزىعى 18 شاقىرىمعا شەگىنىپ كەتكەن. اقتاۋدا باس قوسقان تابيعات جاناشىلارلارى بۇل قۇبىلىستى ەكولوگيالىق اپاتقا تەڭەپ وتىر. جيىنعا تاۋەلسىز ساراپشىلار, جەرگىلىكتى ۋاكىلەتتى ورگاندارمەن قاتار, حالىقارالىق ۇيىم مۇشەلەرى دە قاتىستى.

«كاسپيدىڭ جىلدام تايىزدانۋىنا وعان قۇياتىن 130 وزەننىڭ كوبىنىڭ تارتىلىپ قالۋى, اسىرەسە, ەدىلدىڭ بويىندا 12 سۋ ەلەكتر ستانتسياسى سالىنۋى تىكەلەي اسەر ەتتى. ماسەلە عالامدىق دەڭگەيگە كوتەرىلمەۋىن كاسپي ماڭى ەلدەرى بىرلەسە ارەكەت ەتۋ ارقىلى عانا توقتاتا الادى», — دەيدى فورۋمعا قاتىسۋشىلار.

كەيىنگى جىلدارى جۇرگىزىلگەن زەرتتەۋلەر تەڭىز سۋىنىڭ جالپى اۋماعى 70 مىڭ شارشى شاقىرىمعا دەيىن شەگىنىپ كەتكەنىن كورسەتكەن.

«كاسپي ارالدىڭ تاعدىرىن باستان كەشۋى مۇمكىن. كەلەتىن سۋدىڭ مولشەرى كوبەيەدى ەكەن دەپ ۇمىتتەنۋدىڭ قاجەتى جوق. ولاي بولسا, باسقا جوبانى قاراستىرۋ قاجەت. سوناۋ سولتۇستىكتەگى وب وزەنىنىڭ ءبىر بولىگىن تورعاي قاقپاسى ارقىلى كاسپي تەڭىزىنە اكەلىپ قۇيۋ. ەكىنشى نۇسقا — ەۋرازيا كانالىن سالۋ. بۇل كانال ارقىلى قارا تەڭىزبەن, دالىرەك ايتقاندا, ازوۆ تەڭىزى مەن كاسپي تەڭىزىنىڭ اراسىن قۋما-ماناش ويپاتتارى ارقىلى قوسۋ», — دەيدى Amanat پارتياسى جانىنداعى ەكولوگيالىق كەڭەستىڭ توراعاسى ورىنباسار توعجانوۆ.