«كەلىن ەكەۋىنە ىرىمداپ باتا بەرگەم»: ساكەن مايعازيەۆ ەلدوس «كولوبوكتىڭ» بالالى بولۋىنا سەبەپكەر ەكەنىن ايتتى

فوتو: الەۋمەتتىك جەلىدەن

تانىمال ءانشى ساكەن مايعازيەۆ بلوگەر ەلدوس كولوبوكتىڭ بالالى بولۋىن تىلەپ, ىرىمداپ باتا بەرگەنىن ايتتى, دەپ حابارلايدى Qandastar.kz. 

ساكەننىڭ سوزىنشە, ول مەيرامبەك بەسپاەۆتىڭ كوكپار تويىندا ەكى جاسقا ىرىمداپ ولجالاعان اقشاسىن بەرگەن.

«جاراسىمدى جۇپ ءۇشىن قاتتى قۋانىشتىمىز! ەلدوستايدىڭ  بىر سۇحباتىن كورىپ قالىپ, تىلەكتەس بولىپ جۇرگەندەردىڭ ءبىرى ءبىز ەدىك. 2023 جىلدىڭ قاراشاسىندا مەيرامبەك دوسىم باتا كوكپار بەرىپ, مەن ون مىڭ تەڭگە ولجالاعام. «سول باتا دارىپ, سەندەرگە دە پەرزەنت جۇعىستى بولسىن», — دەپ سول ون مىڭ تەڭگەنى ەلدوسقا ۇسىنىپ, كەلىن ەكەۋىنە باتا بەرىپ ەم. (دەرەۋ ەسكەرتىپ قويايىن, اۋليەلىگىم جوق) نيەت قوي. ارينە, ءبارى ءبىر اللانىڭ قالاۋى, اتا-انانىڭ دۇعاسى, كوپتىڭ تىلەۋى, ەكى جاستىڭ سەنىمى. سول ءۇشىن ءبىر-بىرىمىزگە جاقسى ءسوز ايتىپ, جاقسى ويدا جۇرەيىك. اللا تاعالا ساليقالى, سانالى, يماندى, ءبىلىمدى, ونەرلى ۇرپاقتار سىيلاي بەرسىن. ءسابي كۇتىپ جۇرگەن جاندارعا جۇعىستى بولسىن. ءبىز دە ەكىنشى پەرزەنتىمىزدى 15 جىل كۇتكەنبىز. ماحابباتتارىڭىز باياندى, بەرىك بولسىن!», — دەپ جازدى ءانشى.