جاڭالىقتار
«كەلىپ كەتكەن شوۋلاردى كىنالاعاننان نە پايدا?»: مۇحامەدجان تازابەك قوعامداعى وزگەرىس تۋرالى وي ءبولىستى
ايتىسكەر اقىر ءارى قازىر ءوزىن كوۋچ رەتىندە تانىستىرىپ جۇرگەن مۇحامەدجان تازابەك الەۋمەتتىك جەلىدە جازبا جاريالاپ, وقىرماندارىن ويلاندىرىپ قويدى, دەپ حابارلايدى Qandastar.kz.
ول جازباسىندا ءناپسى جايىندا ءسوز قوزعاپ, وقىرماندارىن ءتۇزۋ جولعا شاقىرعان.
– شايتان دا, ءناپسى دە ادام بالاسى ءۇشىن سىناق. شايتان – اتا جاۋ, ءناپسى قولدانار قۇرالى. اللا ءار نارسەنى حيكمەتپەن جاراتقان. پەندە ءۇشىن نەگىزگى پروبلەما ولار ەمەس. نەگىزگى پروبلەما – اللادان الىستاۋ, ونىڭ پاناسىنان شىعىپ قالۋ. اللا ساقتاماسا, بىلامىققا ءتىس سىنادى, تاۋ ارقالاعان تاسقا سۇرىنەدى…
اللا پانا بولسا, قىرىق جىل قىرعىننان دا امان شىعاسىڭ. اللانىڭ نازارى تۇسسە, ءوزىڭ كۇنادان تيىلىپ, ءسوزىڭ ىزگىلىككە بۇيىرىپ, جاراتىلىسقا زيانىڭ تيمەي, جاراتقانعا ءيىلىپ وتەسىڭ…
اللاڭدى ويلاماساڭ, ازعىرۋشى كەپ دوسىڭا اينالادى…
دەنساۋلىعىڭ سىر بەرسە, ءوتىپ بارا جاتقان وكپەك جەل, كەتىپ بارا جاتقان كەسەل دە سەنى ىزدەپ تابادى…
تىنىشتىقتى قادىرلەمەسەڭ, ىرىڭ-جىرىڭ ىرگەڭنەن كەتپەي قويادى…
جابىق كيىمدى جاۋ ساناساڭ, جالاڭاشتىق كەپ, تورىڭدە قول ۇرعىزادى…
تۇلعاڭدى ارداق تۇتپاساڭ, تۇعىرسىزدار كەپ كوشىڭنىڭ تىزگىنىن ۇستايدى…
ەشكىمدى كىنالاپ, ەشكىمگە رەنجۋدىڭ قاجەتى جوق.
ەسىگىڭ اشىق تۇرسا, كورشىڭدى ۇرى تۇتقاننان نە پايدا, قازاننان قاقپاق كەتسە, ءيتتى قۋالاعاننان نە پايدا, ۇلكەندە ۇلگى, كىشىدە ۇيات ازايسا, كەلىپ كەتكەن شوۋلاردى كىنالاعاننان نە پايدا?! “جىن دا بەيىمدىنى ۇرادى..!” (ماقال), – دەپ جازدى مۇحامەدجان تازابەك.
