«كەلىسىم جوق»: پۋتين مەن ترامپتىڭ كەزدەسۋى اياقتالدى

فوتو: Reuters.com

رەسەي پرەزيدەنتى ۆلاديمير پۋتين مەن اقش پرەزيدەنتى دونالد ترامپ اراسىندا الياسكادا وتكەن كەلىسسوزدەرى اياقتالدى, دەپ جازدى qandastar.kz

بۇل تۋرالى Stan.kz اقپارات اگەنتتىگى حابارلايدى.

كەزدەسۋ 2 ساعات 45 مينۋتقا سوزىلدى. كەلىسسوزدەر شاعىن قۇرامدا, “ۇشكە ءۇش” فورماتىندا ءوتتى. كەزدەسۋگە ەكى پرەزيدەنتتەن بولەك اقش-تىڭ مەملەكەتتىك حاتشىسى ماركو رۋبيو جانە ترامپتىڭ ارنايى وكىلى ستيۆ ۋيتكوفف, رەسەي تاراپىنان سىرتقى ىستەر ءمينيسترى سەرگەي لاۆروۆ پەن ءپۋتيننىڭ كومەكشىسى يۋري ۋشاكوۆ قاتىستى.

كەلىسسوز ناتيجەسى بويىنشا پۋتين مەن ترامپ ءباسپاسوز ءماسليحاتىن وتكىزدى.

پۋتين ءوزىن الياسكاعا شاقىرعانى ءۇشىن ترامپقا العىس ايتىپ, اقش پەن رەسەي ورتاق تاريحى بار جاقىن كورشى ەكەنىن ەسكە سالدى.

ء«بىزدىڭ ەلدەرىمىز شىن مانىندە – جاقىن كورشىلەر. ۇشاقتان تۇسكەن ساتتە مەن: «قايىرلى كۇن, قادىرلى كورشىم, ءسىزدى امان-ەسەن, دەنىڭىز ساۋ كۇيدە كورگەنىمە وتە قۋانىشتىمىن» دەپ ايتتىم», – دەدى رەسەي پرەزيدەنتى.

پۋتين ۋكراينداعى جاعدايدى رەتتەۋ ءۇشىن الدىمەن قاقتىعىسقا سەبەپ بولعان ماسەلەلەردى شەشۋ كەرەگىن قايتالادى.

«كەزدەسۋدىڭ نەگىزگى تاقىرىپتارىنىڭ ءبىرى ۋكراينا توڭىرەگىندەگى جاعداي بولدى. ءبىز ءاردايىم ۋكراين حالقىن باۋىرلاس حالىق دەپ سانادىق. داعدارىستىڭ تۇراقتى شەشىلۋى ءۇشىن قاقتىعىستىڭ تۇپكى سەبەپتەرىن جويۋ قاجەت», – دەدى پۋتين.

سونداي-اق پۋتين رەسەيدىڭ ۋكرايناداعى قاقتىعىستى اياقتاۋعا تولىقتاي مۇددەلى ەكەنىن ەكەنىن اتاپ ءوتتى.

كەلىسسوزدەردىڭ قورىتىندىسىنا ارنالعان ءباسپاسوز ءماسليحاتىندا ترامپ تاراپتار كەلىسىمگە كەلمەگەنىن مالىمدەپ, «تولىق تۇسىنىستىككە» قول جەتكىزە الماعاندارىن اتاپ ءوتتى.

ترامپ سامميت ناتيجەسىن زەلەنسكيمەن, ناتو-داعى وداقستارى جانە ەۋروپالىق ارىپتەستەرىمەن تالقىلاۋى قاجەت ەكەنىن اتاپ ءوتتى.

سوعان قاراماستان ترامپ كەلىسسوزدەر جەمىستى وتكەنىن, پۋتينمەن ءوزارا جاقسى قارىم-قاتىناس ورناعانىن جانە ۋكرايناداعى جاعدايدى رەتتەۋگە قاتىستى بايلانىس جالعاساتىنىن مالىمدەدى.

ءباسپاسوز ءماسليحاتىنىڭ سوڭىندا ترامپ: «پۋتين مىرزا, سىزبەن جاقىن ارادا تاعى كەزدەسەمىن دەپ ۇمىتتەنەمىن» دەدى, ال پۋتين «Next time in Moscow» («كەلەسى جولى ماسكەۋدە») دەپ جاۋاپ بەردى.

پرەزيدەنتتەر جۋرناليستەردىڭ سۇراقتارىنا جاۋاپ بەرمەي, زالدان شىعىپ كەتتى.

ەسكە سالساق, ۋكراينا پرەزيدەنتى ترامپ پەن ءپۋتيننىڭ كەزدەسۋى الدىندا مالىمدەمە جاساپ, “سوعىستى اياقتايتىن ۋاقىت كەلگەنىن” ايتقانەدى.