«Kelisim joq»: Pýtın men Tramptyń kezdesýi aıaqtaldy

Foto: Reuters.com

Reseı prezıdenti Vladımır Pýtın men AQSh prezıdenti Donald Tramp arasynda Alıaskada ótken kelissózderi aıaqtaldy, dep jazdy qandastar.kz

Bul týraly Stan.kz aqparat agenttigi habarlaıdy.

Kezdesý 2 saǵat 45 mınýtqa sozyldy. Kelissózder shaǵyn quramda, “úshke úsh” formatynda ótti. Kezdesýge eki prezıdentten bólek AQSh-tyń memlekettik hatshysy Marko Rýbıo jáne Tramptyń arnaıy ókili Stıv Ýıtkoff, Reseı tarapynan syrtqy ister mınıstri Sergeı Lavrov pen Pýtınniń kómekshisi Iýrıı Ýshakov qatysty.

Kelissóz nátıjesi boıynsha Pýtın men Tramp baspasóz máslıhatyn ótkizdi.

Pýtın ózin Alıaskaǵa shaqyrǵany úshin Trampqa alǵys aıtyp, AQSh pen Reseı ortaq tarıhy bar jaqyn kórshi ekenin eske saldy.

«Bizdiń elderimiz shyn máninde – jaqyn kórshiler. Ushaqtan túsken sátte men: «Qaıyrly kún, qadirli kórshim, sizdi aman-esen, denińiz saý kúıde kórgenime óte qýanyshtymyn» dep aıttym», – dedi Reseı prezıdenti.

Pýtın Ýkraındaǵy jaǵdaıdy retteý úshin aldymen qaqtyǵysqa sebep bolǵan máselelerdi sheshý keregin qaıtalady.

«Kezdesýdiń negizgi taqyryptarynyń biri Ýkraına tóńiregindegi jaǵdaı boldy. Biz árdaıym ýkraın halqyn baýyrlas halyq dep sanadyq. Daǵdarystyń turaqty sheshilýi úshin qaqtyǵystyń túpki sebepterin joıý qajet», – dedi Pýtın.

Sondaı-aq Pýtın Reseıdiń Ýkraınadaǵy qaqtyǵysty aıaqtaýǵa tolyqtaı múddeli ekenin ekenin atap ótti.

Kelissózderdiń qorytyndysyna arnalǵan baspasóz máslıhatynda Tramp taraptar kelisimge kelmegenin málimdep, «tolyq túsinistikke» qol jetkize almaǵandaryn atap ótti.

Tramp sammıt nátıjesin Zelenskıımen, NATO-daǵy odaqstary jáne eýropalyq áriptesterimen talqylaýy qajet ekenin atap ótti.

Soǵan qaramastan Tramp kelissózder jemisti ótkenin, Pýtınmen ózara jaqsy qarym-qatynas ornaǵanyn jáne Ýkraınadaǵy jaǵdaıdy retteýge qatysty baılanys jalǵasatynyn málimdedi.

Baspasóz máslıhatynyń sońynda Tramp: «Pýtın myrza, sizben jaqyn arada taǵy kezdesemin dep úmittenemin» dedi, al Pýtın «Next time in Moscow» («Kelesi joly Máskeýde») dep jaýap berdi.

Prezıdentter jýrnalısterdiń suraqtaryna jaýap bermeı, zaldan shyǵyp ketti.

Eske salsaq, Ýkraına prezıdenti Tramp pen Pýtınniń kezdesýi aldynda málimdeme jasap, “soǵysty aıaqtaıtyn ýaqyt kelgenin” aıtqanedi.