كەمەل توقاەۆتىڭ ەسىمى بىشكەك مەكتەبىنىڭ بىرىنە بەرىلدى

قازاق جازۋشىسى, قازاقستان پرەزيدەنتى قاسىم-جومارت توقاەۆتىڭ اكەسى كەمەل توقاەۆتىڭ ەسىمى بىشكەكتەگى مەكتەپتەردىڭ بىرىنە بەرىلدى, دەپ حابارلايدى qandastar.kz سايتى. 

«بىشكەك قالاسىنداعى №33 مەكتەپ-گيمنازياعا قازاق جازۋشىسى ءارى قازاقستان پرەزيدەنتى قاسىم-جومارت توقاەۆتىڭ اكەسى كەمەل توقاەۆتىڭ ەسىمى بەرىلدى», – دەدى قىرعىزستان پرەزيدەنتىنىڭ ءباسپاسوز حاتشىسى اسكات الاگوزوۆ.

ونىڭ ايتۋىنشا, بۇل باستاما قىرعىزستان پرەزيدەنتى سادىر جاپاروۆقا تيەسىلى.

«جاپاروۆ بۇل شەشىم جايلى قاسىم-جومارت توقاەۆقا رەسەيگە جاساعان جۇمىس ساپارى كەزىندە حابارلاعان. ۇلى وتان سوعىسى جىلدارىندا كەمەل توقاەۆ سول كەزدەگى قازىرگى №33 مەكتەپ عيماراتىندا ورنالاسقان فرۋنزە جاياۋ اسكەر ۋچيليششەسىندە ءبىلىم العان. وسى جەردەن ول مايدانعا اتتانعان», – دەلىنگەن حابارلامادا.

كەمەل توقاەۆيچ توقاەۆ (1923 جىلدىڭ 2 قازانى, الماتى وبلىسى, قاراتال اۋدانى, كالپە اۋىلى – 1986 جىلدىڭ 6 قازانى, الماتى) – قازاق كەڭەستىك جازۋشىسى, جۋرناليست جانە رەداكتور, قازاق ادەبيەتىندەگى دەتەكتيۆ جانرىنىڭ نەگىزىن قالاۋشى. ۇلى وتان سوعىسىنىڭ ارداگەرى, ستالينگراد شايقاسىنا قاتىسقان. «ەرلىگى ءۇشىن» مەدالى مەن باسقا دا اسكەري ناگرادالارمەن ماراپاتتالعان. سوعىستان كەيىن قازاق مەملەكەتتىك ۋنيۆەرسيتەتىنىڭ فيلولوگيا فاكۋلتەتىن ءتامامداپ, «قازاقستان پيونەرى», «سوتسياليستىك قازاقستان» سياقتى ءىرى گازەتتەردە رەداكتور جانە باس رەداكتور بولىپ جۇمىس ىستەدى. 1960–1977 جىلدار ارالىعىندا قازاق كسر جوعارعى كەڭەسىنىڭ «ۆەدوموستار» گازەتىنىڭ باس رەداكتورى قىزمەتىن اتقاردى. «قاستاندىق ىزدەرى», «سوڭعى سوققى», «سولدات سوعىسقا كەتتى» سەكىلدى تۋىندىلارى قازاق دەتەكتيۆى مەن شىتىرمان وقيعالى پروزانىڭ كلاسسيكاسىنا اينالعان. كەمەل توقاەۆ ۇلتتىق ادەبيەتتىڭ دامۋىنا ەلەۋلى ۇلەس قوستى.