«كەمى 17 ملن تەڭگە»: قازاقستاندىق الپينيست ەۆەرەستتى باعىندىرۋ ءۇشىن قانشا قاراجات كەرەك ەكەنىن ايتتى

بۇگىن, 23 مامىر الماتىدا Kazakh Everest Team ۇلتتىق-پاتريوتتىق ەكسپەديتسياسى قاتىسۋشىلارىمەن ءباسپاسوز كونفەرەنتسياسى ءوتتى.

كونفەرەنتسيا بارىسىندا الپينيستەر الەمنىڭ ەڭ بيىك شىڭى ەۆەرەستكە (8 848 مەتر) كوتەرىلۋ ءۇشىن قانشا دايىندالعانىن جانە جالپى كوتەرىلۋ قالاي وتكەنىن بايانداپ بەردى. «ەۆەرەستتى ەكى رەت ءساتتى باعىندىرىپ كەلگەن تاجىريبەلى الپينيست رەتىندە ماقسۇت جۇماەۆ بىزگە جاتتىعۋ جوسپارىن ازىرلەدى, دۇرىس تاماقتانۋ جوسپارى بويىنشا ۇسىنىستار بەردى.

ول سونداي-اق كوماندانىڭ بارلىق كيىمى مەن قۇرال-جابدىعىن ءوزى تاڭداپ بەردى. باستاپقىدا دايىندىق پروتسەسى ءبىر جىلدان استام ۋاقىتتى الادى دەپ جوسپارلانعان. بىراق جاتتىعۋ بارىسىندا انار دا, ءبارىمىز دە جاقسى ناتيجە كورسەتتىك, سوندىقتان كوماندا جەدەلدەتىلگەن باعدارلاما بويىنشا جاتتىقتى, ال كيليماندجارو شىڭى ەۆەرەستكە كوتەرىلۋگە دايىندىق ەسەبىنە كىردى», — دەيدى ەۆەرەستكە كوتەرىلگەن ءۇشىنشى قازاقستاندىق المير قىمباتباي ۇلى.

«ەۆەرەستتى باعىندىرۋعا كەتەتىن قاراجات ءبىر ادامعا 40 مىڭ دوللاردان باستالادى. ال ەڭ قىمبات سومما 100 مىڭ دوللاردان اسادى. ول سەرۆيسكە, كوماندادا قانشا ادام بار ەكەنىنە, قانداي گيدپەن بارعانىڭىزعا, شەرپتەردىڭ سانى مەن الىپ جۇرەتىن وتتەگىنىڭ كولەمىنە بايلانىستى», — دەدى ماقسۇت جۇماەۆ.