كەنە قاپتادى: العاشقى ەنتسەفاليت فاكتىسى تىركەلدى

سولتۇستىك قازاقستان وبلىسىندا كەنە قاپتادى. ءبىر جارىم اي ىشىندە دارىگەرگە 400-دەن استام ادام جۇگىنگەن, ولاردىڭ جۇزدەن استامى — بالالار مەن جاسوسپىرىمدەر. بۇل وتكەن جىلدىڭ وسى كەزەڭىمەن سالىستىرعاندا ءۇش ەسە كوپ, دەپ حابارلايدى qandastar.kz.

كەنەلەردىڭ قاپتاۋى كۇننىڭ ەرتە جىلۋىمەن بايلانىستى. پارازيتتەردىڭ ماۋسىمدىق بەلسەندىلىگىنىڭ بۇلاي كۇشەيۋى — وسى جىل مەزگىلىنە ءتان قۇبىلىس. اۋانىڭ جوعارى تەمپەراتۋراسى قىستاعى ۇيقىدان كەيىن جاندىكتەردىڭ تەزىرەك ويانۋىنا سەبەپ بولادى.

«مامىر ايىندا كەنەلەردىڭ اگرەسسيۆتى مىنەز-قۇلقى — قالىپتى جاعداي. تابيعات اياسىندا سەرۋەندەگەن كەزدە اسا ساق بولۋ قاجەت», — دەپ ەسكەرتەدى ەپيدەميولوگتار.

ءوڭىر بيلىگى الدىن الۋ شارالارىن باستاپ كەتتى. قاۋىپ جوعارى ايماقتاردا كەنەلەرگە قارسى وڭدەۋ جۇمىستارى جۇرگىزىلۋدە, سونداي-اق حالىقتى ۆاكتسيناتسيالاۋ باستالدى. سوڭعى دەرەكتەرگە سايكەس, پروفيلاكتيكالىق ەكپەنى شامامەن 600 ادام العان.

الايدا الدىن الۋ شارالارىنا قاراماستان, جۇقتىرعان جاعدايلاردى تولىق بولدىرماۋ مۇمكىن بولمادى. وڭىردە اۋىر دەرتكە شالدىعۋ وقيعالارى تىركەلدى.

وبلىستىق سانيتاريالىق-ەپيدەميولوگيالىق باقىلاۋ دەپارتامەنتىنىڭ مالىمەتىنشە, بەس ادامعا «كەنە ەنتسەفاليتى» دياگنوزى قويىلىپ, ولار اۋرۋحاناعا جاتقىزىلعان. ونىڭ ۇشەۋى پەتروپاۆلدا, ەكەۋى قىزىلجار اۋدانىندا تىركەلدى. ناۋقاستاردىڭ جاعدايى تۇراقتى, قايتىس بولعاندار جوق.