كەنتاۋلىقتار جەردىڭ استىنا ءتۇسىپ كەتەمىز بە دەپ الاڭداپ وتىر

فوتو: اشىق دەرەككوز

كەنتاۋ تۇرعىندارى 900 گەكتار جەردى قورشاپ, ونى «ەكولوگيالىق ايماق» دەپ تانۋدى سۇراپ وتىر. سەبەبى جەر استىندا سۋعا تولعان شاحتالار بار. ادامدار جەر وپىرىلىپ ءتۇسىپ كەتە مە دەپ قورقادى. بۇل تۋرالى qandastar.kz KAZ.NUR.KZ-كە سىلتەمە جاساپ حابارلايدى.

كەنتاۋدا سۋعا تولعان شاحتالاردىڭ ماڭىنداعى تۇرعىندار جەردىڭ شوگىپ جاتقانىنا شاعىمدانۋدا. ءبىر كەزدەرى 900 ءجۇز گەكتاردان استام اۋماقتا قورعاسىن, باريت جانە مىرىش وندىرىلگەن. بۇگىندە بوس شاحتالار سۋعا تولىپ كەتكەن. جەرگىلىكتى تۇرعىندار مەملەكەتتەن اۋماقتى ەكولوگيالىق ايماققا جاتقىزۋدى سۇرايدى. ولار بۇل ماسەلەنىڭ شەشىلۋىن 12 جىل كۇتىپ كەلە جاتقان كورىنەدى.

«وبلىس, قالا اكىمدىگىنە قانشا رەت حابارلاستىق. جەر بەتى شوگىپ بارادى, ادام دا, جان-جانۋار, مال دا ءتۇسىپ كەتپەس ءۇشىن ونى قورشاۋ كەرەك», – دەيدى كەنتاۋ قالاسىنىڭ تۇرعىنى باقتيار عافۋروۆ.

ىقتيمال اقاۋلار ايماعىندا بىرنەشە تۇرعىن ءۇي ورنالاسقان, ساۋىقتىرۋ ورتالىعى مەن ءتۇستى مەتالداردى وڭدەۋ زاۋىتى سالىنعان. سونداي-اق اۋماقتا سۋدى جيناۋ جانە تازارتۋ قوندىرعىسى بار. جەرگىلىكتى تۇرعىنداردىڭ ايتۋىنشا, سۋدى كەنتاۋ قالاسىنىڭ تۇرعىندارى عانا ەمەس, وبلىس ورتالىعى دا سول جەردەن الادى.