«Keshirim bermeımin». Qaldybek Qurmanáli qyzyn zorlaǵan boksshyǵa qatysty málimdeme jasady

Foto: Kollaj El.kz

Tanymal boksshy Janqosh Turarov zorlady dep aıyptaǵan Ánarý Qaldybekqyzynyń ákesi málimdeme jasady, dep habarlaıdy El.kz aqparat agenttigi.

Bul týraly jýrnalıst Gúlbaný Ánııatqyzy áleýmettik jelidegi paraqshasyna jarııalady.

Sportshy Janqosh zorlady dep aryzdanǵan Ánarý Qurmanáliniń ákesimen sóılestim. Qaldybek Qurmanáli belgili sazger, Shámshi ánderin nasıhattap júretinin bilesizder. Qaldybek aǵanyń 2016 jyly ómirden ótken Aqmarjan Taýbaeva esimdi áıelinen Ánarý qyzy men Ánasyl uly bar eken. Balalarymmen aralasyp, kómektesip turatynyn aıtty. Qaldybek Qurmanáli júregine ota jasatyp, densaýlyǵyna baılanysty Túrkistan oblysyna kóship ketken. “Qazir qyzyma kómektesý úshin Almatyǵa keldim” deıdi. “Qyzym jylap kelgende bul soraqylyqty qoǵam bilýi kerek dep, jýrnalıstermen suhbat uıymdastyrǵan da ózim” dep otyr, – dep jazdy ol.

Qaldybek Qurmanáli Janqosh jaqtan keshirim suraǵanyn, biraq eshqandaı keshirim bere almaıtynyn aıtqan.

«Qyzymdy qorǵaýǵa janymdy, barymdy salamyn» dep otyr. Ánarý 28 jastaǵy úlken qyz, tulǵa. Janqoshpen kezdeskeni, oǵan nege sengeni jaıly eshteńe aıta almaımyn dedi. Qoǵamnyń býllınginen soń Ánarý birneshe ret ózine qol jumsamaq bolypty. Qazir depressııada júr deıdi. Qaldybek Qurmanáli bul máselede aıaǵyna deıin qyzynyń qasynda bolatynyn aıtty, – deıdi ol.

Aıta keteıik, boksshy Ánarýmen eshqandaı qarym-qatynasy bolmaǵanyn aıtyp áleýmettik jeldige paraqshasyna jazba qaldyrǵan edi.