«كەشىرىم سۇراماعان»: قاراعاندىدا اكىمنىڭ ۇلى 15 جاستاعى قىزدى قاعىپ كەتكەن

جوعارعى سوت قاراعاندىدا جاياۋ جۇرگىنشىلەر وتكەلىندە كامەلەتكە تولماعان قىزدى قاعىپ كەتكەن اكىمنىڭ ۇلىن جۇرگىزۋشى كۋالىگىنەن ايىردى, دەپ حابارلايدى qandastar.kz اقپارات پورتالى.

Stan.kz-ءتىڭ مالىمەتىنشە, بىلتىر 25 قىركۇيەگىندە قاراعاندى وبلىسىنداعى كەنت اكىمىنىڭ ۇلى 15 جاسار قىزدى دۇيسەمبەكوۆ (ۆولوچاەۆسكايا كوشەسى) كوشەسىندە قاعىپ كەتكەن. اپات ءساتى كوشەدەگى بەينەكامەراعا تۇسكەن. كادرلاردا جاياۋ جۇرگىنشى جولىندا بارلىق كولىك قىزدى وتكىزۋ ءۇشىن توقتاعانى كورسەتىلگەن. الايدا ەكىنشى جولاقتاعى Volvo كولىگى توقتاماي كامەلەتكە تولماعان قىزدى قاعىپ كەتكەن.

«قىزىم ساباقتان شىعىپ, بانك كوللەدجىنەن ۇيگە كەلە جاتقان. كولىكتى اكىمنىڭ ۇلى باسقارعان جانە جولدان قىزىمدى وتكىزبەگەن. ءتىپتى ونىڭ Instagram پاراقشاسىندا جول ەرەجەلەرىن قالاي بۇزىپ جۇرگەنى كورسەتىلگەن بەينە جازبالار بار. ونىڭ كولىگى قاراعاندىداعى 45-بلوكتاعى جولدا بۇرىلىس سيگنالدارىن قوسپاي-اق, ءبىر جولاقتان ەكىنشى جولاققا بىرنەشە رەت اۋىسقان», – دەدى زارداپ شەككەن قىزدىڭ اناسى كريستينا.

قىز اۋرۋحاناعا ءتۇستى. دارىگەرلەر ءىشتىڭ تۇتىككەن جاراقاتىن, پوليتراۆمانى, ميدىڭ شايقالۋىن, ميدىڭ جابىق جاراقاتىن, كەۋدە قۋىسىنىڭ جۇمساق تىندەرىنىڭ كوگەرۋىن, بەتتىڭ جۇمساق تىندەرىنىڭ وڭ جاق كونتۋزياسىن انىقتادى.

«شىعارۋ ەپيكريزىندە قىزىنا ورتاشا جاراقات دياگنوزى قويىلدى دەپ جازىلعان. ول 24 كۇن اۋرۋحانادا جاتتى. شىعارىلعاننان كەيىن دە ول ەكى اپتا بويى ۇيدەن ەم الدى. قىزىم ءالى كۇنگە دەيىن نەۆروپاتولوگ پەن تراۆماتولوگپەن ەمدەلەدى», – دەپ قوستى كريستينا.

بىراق سمە ورتالىعىنىڭ ساراپشىلارى زارداپ شەككەن ادامنىڭ جاراقاتى جەڭىل دەگەن قورىتىندىعا كەلگەن.

قاراعاندى اكىمشىلىك سوتىنىڭ سۋدياسى ليۋبوۆ رىبالكينا اكىمنىڭ ۇلىن اقبتك-ءنىڭ 610-ءبولىمى 2-بابى بويىنشا مۇمكىندىگىنشە قاتاڭ جازالادى. جۇرگىزۋشى 9 ايعا جۇرگىزۋشى كۋالىگىنەن ايىرعان. الايدا شەنەۋنىكتىڭ ۇلى اپەللياتسيالىق شاعىم ءتۇسىرىپ, وعان جۇرگىزۋشى كۋالىگىن قايتارۋدى سۇرادى. وبلىستىق سوتتىڭ سۋدياسى ەران ەرمەكوۆ جازا ءتۇرىن ايىپپۇلعا اۋىستىرىپ, وعان كۋالىگىن قايتارىپ بەردى.

جوعارعى سوت بولسا, قاراعاندى وبلىستىق سوتىنىڭ قاۋلىسىنىڭ كۇشىن جويدى. جاڭا شەشىممەن اكىمنىڭ ۇلى 9 اي مەرزىمىندە جۇرگىزۋشى كۋالىگىنەن ايىرىلدى.

«جۇرگىزۋشى جول قوزعالىسى ەرەجەلەرىن ورەسكەل بۇزۋ سالدارىنان جول – كولىك وقيعاسىن جاسادى. ول جاياۋ جۇرگىنشىلەر وتكەلىنەن وتەتىن جاياۋ جۇرگىنشىگە جول بەرمەدى. بۇل وقيعا كامەلەتكە تولماعاندارعا كوپتەگەن دەنە جاراقاتتارىن سالدى. ىستە جابىرلەنۋشىگە كەلتىرىلگەن زالالدى وتەۋ فاكتىسىن راستايتىن قۇجاتتار جوق. جابىرلەنۋشى تاراپتىڭ وتىنىشىندە جۇرگىزۋشى تاراپىنان وكىنۋدىڭ جوقتىعى كورسەتىلەدى. ول سوتتا تەك ونىڭ كولىگىنە كەلتىرىلگەن زالال تۋرالى الاڭداعان. ولارعا جول كولىك سالدارىن جويۋ جونىندە شارالار قولدانىلمادى, كەشىرىم سۇرالمادى, جابىرلەنۋشىلەرگە زالال وتەلمەدى. العان جاراقاتتارىنىڭ سالدارىنان ۇزاق ەمدەۋ جانە وڭالتۋ كۋرسىنان وتكەن كامەلەتكە تولماعان قىزعا كومەك كورسەتىلمەدى. سونداي-اق, بۇرىن جول قوزعالىسى ەرەجەلەرىن بىرنەشە رەت بۇزۋ فاكتىسى ەسكەرىلمەگەن. قاراعاندى وبلىستىق سوتىنىڭ قاۋلىسى زاڭسىز دەپ تانىلسىن جانە كۇشى جويىلسىن. ءبىرىنشى ساتىداعى سوتتىڭ قاۋلىسى زاڭدى جانە نەگىزدەلگەن دەپ تانىلسىن», – دەپ شەشىم شىعاردى سۋديا.