الەم جاڭالىقتارى
كەتي ليچ: ۇلىبريتانيا قازاقستاننىڭ كيىز ءۇي گلەمپينگى تاجىريبەسىن ەنگىزدى
فوتو: اشىق دەرەككوز
ۇلىبريتانيادا كيىز ءۇيى ءتۋريزمى بەلسەندى دامىپ, ساياحاتشىلارعا گلەمپينگتىڭ ەرەكشە تاجىريبەسىن ۇسىنۋدا. بۇل تۋرالى ۇلىبريتانيانىڭ قازاقستانداعى ەلشىسى كەتي ليچ «Kazakh Tourism» اكتسيونەرلىك قوعامى باسقارماسىنىڭ توراعاسى قايرات سادۋاقاسوۆتىڭ «Born Bold. Travel Boldcast» اۆتورلىق پودكاستىندا ايتىپ بەردى, دەپ جازدى qandastar.kz
ديپلومات سۇحباتىندا تۇراقتى ءتۋريزمنىڭ جانە تابيعاتقا ەڭ تومەن دەڭگەيدە اسەر ەتەتىن گلەمپينگ تۇجىرىمداماسىنىڭ ماڭىزدىلىعىن اتاپ ءوتتى.
«ءتۋريزمنىڭ تۇراقتىلىعى – وسى سالاداعى ماڭىزدى ماسەلەلەردىڭ ءبىرى. مەنىڭ ويىمشا, تابيعاتقا اسەرى تومەن ءتۋريزمنىڭ بىرنەشە ءتۇرى بار. شىنتۋايتىندا, ءبىز قازاقستاننان ماڭىزدى كونتسەپتسيانى – تۇتاس كيىز ءۇي گلەمپينگى, ياعني ءساندى كەمپينگ يدەياسىن وزىمىزگە قابىلدادىق. ول كيىز ۇيلەردى قامتيدى جانە ۇلىبريتانيادا تانىمال بولىپ وتىر», – دەپ اتاپ ءوتتى كەتي ليچ.
قازاق تىڭ كيىز ۇيلەرى ۇلىبريتانيادا كەڭىنەن قولدانىلۋدا. بۇل شەتەلدىكتەرگە تەك تابيعاتپەن ۇندەسۋگە عانا ەمەس, قورشاعان ورتاعا اسەردى ازايتۋعا مۇمكىندىك بەرەدى. ەلشى وسىنداي جوبالاردىڭ ءتۋريزمدى تۇراقتى ءارى ەكولوگيالىق قاۋىپسىز ەتۋگە كومەكتەسەتىنىن ايتتى.
