«كەتپەنمەن اياۋسىز ۇرعان»: اقمولا وبلىسىندا ايەل اسىراپ العان بالاسىنا قورلىق كورسەتكەن

فوتو: شاراينا

كامەلەتكە تولماعان بالانى تاربيەلەۋ بويىنشا مىندەتتەرىن ءتيىستى ورىنداماعانى ءۇشىن اقمولالىق ايەل سوت الدىنا كەلدى. سوتتا ايەل 11 جاسار بالانى تەمىر كەتپەنمەن ۇرعانى بەلگىلى بولعان. ايەل ايىپپۇلمەن قۇتىلدى, دەپ حابارلايدى qandastar.kz Skifnews.kz اقپارات پورتالىنا سىلتەمە جاساپ.

بۋراباي اۋداندىق سوتى كامەلەتكە تولماعانعا قاتىگەزدىكپەن قاراۋىمەن ۇشتاسقان كامەلەتكە تولماعان بالانى تاربيەلەۋ جونىندەگى مىندەتتەردى تيىسىنشە ورىنداماعانى ءۇشىن ازاماتشا س.-عا قاتىستى قىلمىستىق ءىس قارادى (قك-ءنىڭ 140-بابىنىڭ 2-بولىگى).

«سوتتا ششۋچينسك قالاسىنىڭ تۇرعىنى س. 2022 جىلدىڭ ناۋرىزىندا پسيحيكالىق اۋرۋ دياگنوزىمەن 2014 جىلى تۋىلعان كامەلەتكە تولماعان چ.-نى پاتروناتتىق تاربيەلەۋگە الىپ, ونى تاربيەلەۋ جانە وعان قامقورلىق جاساۋ جونىندەگى مىندەتتەردى ءوز موينىنا الىپ, بالانى جيە ۇرىپ-سوعۋعا ۇشىراتقانى انىقتالعان.

وسىلايشا 2024 جىلدىڭ قازان ايىندا س. بالانىڭ اياعىن تەمىر ۇساقتاعىشپەن ۇرىپ, دەنەسىنە زاقىم كەلتىرگەن. سوت-مەديتسينالىق ساراپتامانىڭ قورىتىندىسىنا سايكەس, بالانىڭ دەنەسىندە سىزاتتار, تىرتىق تۇرىندە دەنە جاراقاتتارى انىقتالدى.

جازا تاعايىنداۋ كەزىندە سوت اۋىرلاتاتىن ءمان-جاي دەپ كىنالىگە تاۋەلدى دارمەنسىز بالاعا قاتىستى قىلمىستىق تەرىس قىلىق جاساعانىن ەسكەردى», — دەلىنگەن حابارلامادا.

سوت س.-عا پەداگوگيكالىق لاۋازىمداردى اتقارۋ نەمەسە كامەلەتكە تولماعان بالالاردى تاربيەلەۋگە بايلانىستى قىزمەتپەن اينالىسۋ قۇقىعىنان 2 جىلعا ايىرا وتىرىپ, 80 اەك (295 360 تەڭگە) مولشەرىندە ايىپپۇل تاعايىندادى.

سوت اكتىسى زاڭدى كۇشىنە ەنگەن جوق.