«كىم باقىلايدى»: قازاقستاندا تاعى ءتورت اۋەجاي ساتىلادى

كوللاج: ulysmedia.kz.

كولىك ءمينيسترى مارات قاراباەۆ قوستانايداعى اۋەجاي ساتىلىپ جاتقانىن راستادى. ول جالعىز قوستاناي ەمەس, باسقا دا وڭىرلەردەگى اۋەجايلارعا ينۆەستورلار تارتىلاتىنىن ايتادى, دەپ حابارلادى Ulysmedia.kz.

نەگە قازاقستاننىڭ كومپانيالارىنا بەرمەسكە?

بۇعان دەيىن ەكونوميست راسۋل رىسمامبەتوۆ قازاقستانداعى تاعى ءبىر اۋەجاي ساۋدا, اتاپ ايتقاندا قوستانايداعى اۋەجاي ساتىلاتىنىن ايتقان ەدى. ساراپشى ەلدەگى اۋەجايلاردىڭ جاپپاي ساتىلىپ جاتقانىنا الاڭدايتىنىن جازعان.

– ولاردى ساتسقا, بىرىنشىدەن, ازىراق اقشا تابامىز, ال ەكىنشىدەن ستراتەگيالىق نىساندى جوعالتامىز: شەتەلدىكتەردىڭ ساتىپ الۋ ىقتيمالدىعى جوعارى. مىسالى, ورال, سقو, اتىراۋ, الماتىداعى اۋەجايلار تىكەلەي نەمەسە جاناما بولسىن شەتەلدىكتەردىڭ يەلىگىندە. نەگە ولاردى قازاقستاندىق كومپانيانىڭ باسقارۋىنا بەرمەسكە? – دەيدى ول.

قاراباەۆ نە دەيدى

وسى سۇراقتى بۇگىن Ulysmedia.kz تىلشىسى قازاقستاننىڭ كولىك ءمينيسترى مارات قاراباەۆقا قويعان.

– قوستانايداعى اۋەجايدى بەلگىلى ءبىر ينۆەستوردىڭ ساتىپ الاتىنى جونىندە ەشقانداي ءوتىنىم كەلىپ تۇسكەن جوق. ءوتىنىش تۇسەتىن بولسا مەملەكەت تاراپىنان ول مىندەتتى تۇردە قاراستىرىلاتىن بولادى. اۋەجاي – ستراتەگيالىق نىسان ءارى ونىڭ كىمگە ساتىلىپ, كىمگە ساتىلمايتىنى ۇكىمەتتىڭ قۇزىرەتىندە. وسى ۋاقىتقا دەيىن قوستانايداعى اۋەجايدى ساتىپ الۋعا ەشبىر ينۆەستور ىنتا تانىتقان جوق, – دەيدى ول.

قاراباەۆتىڭ ايتۋىنشا, جالپى ەلدەگى اۋەجايلارعا ينۆەستورلاردى تارتۋ جۇمىسى جۇرگىزىلىپ جاتىر. ول اۋەجايلاردى قازاقستاندىق ينۆەستور دا, شەتەلدىك ينۆەستور دا الۋى مۇمكىن. قاراباەۆ اۋەجايلارعا شەتەلدىك ينۆەستورلاردىڭ كەلۋى – زاڭعا قايشى ەمەس ەكەنىن ايتتى.

– قازاقستاندىق ينۆەستور بولسىن, شەتەلدىك بولسىن – بىز ونى قولدايمىز. ويتكەنى قاي كەزدە دە اۋەجاي مەملەكەتتىك ورگانداردىڭ تولىق باقىلاۋىندا بولادى. ونىڭ قۇرىلتايشىسى شەتەلدىك بولسا دا ول باقىلاۋدان تىس قالمايدى, – دەيدى قاراباەۆ.

مينيستر الماتىداعى اۋەجايعا شەتەلدىك ينۆەستور 250 ملن دوللار ينۆەستيتسيا سالعانىن اتاپ وتەدى.

– تەك قوستانايداعى ەمەس, قىزىلوردا, تۇركىستان, شىعىس قازاقستانداعى اۋەجايلار – مەملەكەت مەنشىگىندە. ول جاققا ينۆەستور تارتىپ, ينۆەستيتسيالارى ارقىلى ينفراقۇرىلىمىن جاڭعىرتۋ – مەمەلەكەتتىڭ باسىم باعىتتارىنىڭ ءبىرى. ءبارىبىر ول مەملەكەتتىڭ باقىلاۋىندا بولادى, – دەيدى ول.

بۇعان دەيىن پرەمەر-مينيستر ولجاس بەكتەنوۆ اتىراۋ اۋەجايىنىڭ اكتسيالارىن جاڭا يەسىنە بەرۋ جونىندە قاۋلىعا قول قويعان ەدى.