Jańalyqtar
«Kim ol sonshama»: depýtat QTJ-nyń basqarma tóraǵasyn synǵa aldy
Búgin májilis otyrysynda depýtat Edil Jańbyrshın kompanııanyń esebi tyńdalǵan sátte parlamentke kelmegen QTJ basshysy Nurlan Saýranbaevty synǵa aldy,-dep habarlaıdy Qandastar.kz
«Búgin parlamentte QTJ-ǵa kóptegen suraq boldy. Biraq QTJ-nyń prezıdenti joq. Saýranbaev degen kim ol? Nege kelmeıdi? Parlamentte jumys istegenime úsh jyl boldy, ol ómiri kelgen emes. Qaıta-qaıta osy másele kóteriledi, Saýranbaev kelmeıdi. Ne qylǵan adam ol? QTJ-da jemqorlyq bylyǵyp jatyr, ol munda kelip jaýap bermeıdi, orynbasarlaryn jiberedi. QazaqGaz-dy qaraǵan kezde, bastyǵy keldi, «Samuryq-Qazynany» qaraǵan kezde, bastyǵy keldi.
Al nege QTJ-nyń bastyǵy kelmeıdi? Kim ol sonshama? Suraq bar. Barlyǵyn sheshetin kadr. Temirjolshylar turyp jatqan býdkasyn qarańyzdar. On toǵyzynshy ǵasyrdaǵy býdkalar.
Uıat emes pe? QTJ-nyń prezıdenti bir ret te temirjolshylarmen kezdesken joq. Olardyń máselesin tyńdaǵan joq. Qansha ereýil boldy, bireýine de barǵan joq. Kim ol sonshama? Depýtattan myqty ma ol sonshama? Bul degen durys emes», – dedi Jańbyrshın.
Sondaı-aq depýtat Qazaqstan men Reseı temirjol tasymalynyń tabysyn salystyrdy. «Olardyń 2023 jylǵy kórsetkishteri – 737 mlrd rýbl, bizdiń aqshamyzǵa shaqsaq, 3,7 trln. Olarda amortızaııa, salyq t.b. almaǵan kezdegi kiris osyndaı. Bizdiń QTJ-da 3 trln qaryz bar», – deıdi depýtat.
Jańbyrshın «barlyq qazaqstandyq ulttyq kompanııany parlamentke shaqyryp, aqshany qaıda jumsap jatqanyn suraý kerek» degen usynys aıtty. «Mende mynandaı usynys bar. Parlamentke QTJ-ny shaqyryp, búkil máselesin maıshammen qaraý kerek. Memlekettiń qarjysyn ala beredi. Basqa jerge aqsha jetpeı jatqan kezde biz soǵan quıa beremiz. Al olar qaryzǵa batyra beredi. Ondaı menedjerlerdi joq qylý kerek…
Nege munda basqa ulttyq kompanııalardy shaqyrmaımyz? «QazMunaıGazdy» shaqyraıyq, «Qazatompromdy» shaqyraıyq. Konstıtýııa boıynsha, eldiń baılyǵy halyqtiki emes pe? Shaqyryp, aqshanyń bári qaıda ketip jatqanyn tyńdaıyq. Bonýstary, eńbekaqylary, úıleri, kólikteri qandaı olardyń? Ol eldiń aqshasy. Sondyqtan «QTJ» kúzdegi sessııaǵa parlamentke daıyndalyp kelsin. Olar qashanǵy halyqtyń baılyǵyn qaltasyna basyp, shalqyp júredi? Halyqtyń jaǵdaıyn qashan oılaımyz biz? Olardyń ótirigine senip otyra beremiz be? Olaı bolmaıdy» – dedi Jańbyrshın. Ol qajet bolsa, parlamentte osy másele boıynsha komıssııa qurý kerek ekenin aıtty.
