قارجى جانە تولەمدەر
كىمدەردىڭ جالاقىسى 50 پايىزعا وسەتىنى بەلگىلى بولدى — توقاەۆ جاڭا زاڭعا قول قويدى
سۋ سالاسى قىزمەتكەرلەرىنىڭ جالاقىسى 50%-عا دەيىن وسەدى, دەپ حابارلايدى qandastar.kz سۋ رەسۋرستارى جانە يرريگاتسيا مينيسترلىگىنىڭ ءباسپاسوز قىزمەتىنە سىلتەمە جاساپ.
مەملەكەت باسشىسى قاسىم-جومارت توقاەۆ سۋ سالاسى قىزمەتكەرلەرىنىڭ جالاقىسىن كوتەرۋگە باعىتتالعان «تابيعي مونوپوليالار تۋرالى» زاڭعا وزگەرىستەر ەنگىزۋدى كوزدەيتىن زاڭعا قول قويدى. تۇزەتۋلەردى سۋ رەسۋرستارى جانە يرريگاتسيا مينيسترلىگى ازىرلەدى.
«وزگەرىستەر سۋمەن جابدىقتاۋ جانە سۋ بۇرۋ قىزمەتتەرىن كورسەتەتىن 25 مىڭنان استام قىزمەتكەردىڭ جالاقىسىن ارتتىرۋعا مۇمكىندىك بەرەدى», — دەپ جازىلعان ۆەدومستۆو حابارلاماسىندا.
وڭىرگە جانە ستاتيستيكالىق دەرەكتەرگە قاراي جالاقى ورتا ەسەپپەن 35–50%-عا ءوسىپ, جىلۋ جانە ەلەكتر ەنەرگەتيكاسى سالالارىنداعى مامانداردىڭ دەڭگەيىنە دەيىن جەتەدى. بۇل سۋ سالاسىنداعى كادر تۇراقسىزدىعىن ازايتىپ, جوعارى بىلىكتى مامانداردى تارتۋعا جول اشادى.
«تابيعي مونوپوليالار تۋرالى» زاڭعا ەنگىزىلگەن وزگەرىستەر بيىل 1 قىركۇيەكتەن باستاپ كۇشىنە ەنەدى.
«ستاتيستيكالىق مالىمەتتەرگە سايكەس, جىلۋ جانە ەلەكتر ەنەرگەتيكاسى سالاسىندا ورتاشا جالاقى – 330 مىڭ تەڭگە. ال سۋ شارۋاشىلىعى سالاسىندا – 231 مىڭ تەڭگە. ايتارلىقتاي ايىرماشىلىق بار. قابىلدانعان تۇزەتۋلەر ەلىمىزدىڭ دامۋى ءۇشىن اسا ماڭىزدى سۋ سالاسىنىڭ كادرلىق الەۋەتىن ارتتىرۋعا باعىتتالعان», – دەدى سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ.
