«Kinám joq»: Jelide Perızat Qaırattyń suhbaty tarady

Foto: skrın

Áleýmettik jelilerde jýyrda ustalǵan Perızat Qaırattyń «suhbaty»jarııalandy. Onda erikti retinde tanylǵan Perızat Qaırat Qarjylyq monıtorıng agenttigi taqqan barlyq aıypty joqqa shyǵarǵan eken. Alaıda stopfake.kz munyń alaıaqtar adamdardy aldaý úshin qoldanatyn feık suhbat ekenin jazdy, – dep habarlaıdy qandastar.kz aqparat portaly Massaget.kz saıtyna silteme jasap.

Basylym málimetinshe, jelide taraǵan jazbanyń taqyryby da qyzyq jáne onda Tengrinews.org degen saıtqa silteme jasalǵan. Degenmen saıttyń domeni ulttyq .kz emes, halyqaralyq .org ekenin baıqaýǵa bolady.

Tengrinews jańalyqtar portaly .kz domenin paıdalanady.

«Alaıaqtar neǵurlym senimdi bolýy úshin qazaqstandyq ınternet basylymnyń basty betin tolyǵymen kóshirip alǵan», – dep jazylǵan derekte.

Suhbat mátininde alaıaqtar «passıvti kiris» usyna otyryp, tanymal qazaqstandyq banktiń baǵdarlamasyn jarnamalaıdy. Shyn máninde, bul baǵdarlamanyń qarjy ınstıtýtyna eshqandaı qatysy joq, ol – qylmystyq shemanyń bir bóligi.

«Kıberqylmyskerler jalǵan saıtta tez arada dıvıdend tólenetinin aıtyp, ótinim toltyrýdy usynady. Olardyń qýlyǵyna túsip qalmańyz: kúmándi saýalnamalardy toltyrmańyz jáne ońaı paıda tabýdy usynǵan beıtanys adamdarǵa senbeńiz. Belsendige taǵylǵan aıyptar joqqa shyǵarylǵan joq, al aqparattyń ózi – alaıaqtyq shemanyń bir bóligi. Alaıaqtardyń kózdegen maqsaty – jeke derekterińiz ben aqshańyzdy ıemdený úshin sizdi jalǵan saıtqa tartý», – dep jazylǵan derekte.

Aıta keteıik, Perızat Qaırat – Biz Birgemiz Qazaqstan qaıyrymdylyq qorynyń tóraıymy, Qazaqstandaǵy belsendi eriktiler qozǵalysynyń jetekshisi retinde tanymal. Ol sý tasqynynan zardap shekkenderge kómek kórsetý, Gaza sektoryndaǵy gýmanıtarlyq mıssııalar jáne basqa da qaıyrymdylyq sharalarymen aınalysyp, qoǵamda bedelge ıe boldy.