«Kinásizdigimdi dáleldeımin, bolmasa ólemin»: Vıe-admıral Januzaqov sottalǵanda qandaı kúıde bolǵanyn aıtty

Foto: ashyq derekkóz

Adal ADAM youtube arnasyna QR Áskerı-teńiz kúshteriniń vıe-admıraly Jandarbek Januzaqov suhbat berdi. Ol 2020 jyly sotty bolǵanda ádiletsizdikke shydamaǵanyn jetkizdi, – dep habarlaıdy qandastar.kz.

«Men sot úkimimen kelispedim. Dálelderimdi usyndym. Kináli emes ekenimdi aıttym. Aqsha almadym, zań buzbadym dedim. Soǵan narazylyq retinde 42 kún ashtyq jarııaladym. Meni SIZO qyzmetkerleri eki kameradan baqylap qarap otyrdy. 42 kún tamaq ishpedim, sonyń eki aptasynda múlde nár tatpadym. Sý da ishpedim. 27 keli salmaq tastadym. Sosyn prokýror, advokat keldi. SIZO-nyń bastyqtaryn da aıadym, olar maǵan «bizdi jumystan alyp tastaımyz dep tynyshtyq bermeı jatyr» dedi. Sóıtip 42 kúnnen keıin ashtyqty toqtattym», – dedi Jandarbek Januzaqov.

Vıe-admıraldyń aıtýynsha, kemelerdi jalǵa qoıý boıynsha kelisim-sharttyń zańdylyqtaryn 5 aı boıy pysyqtap, Qorǵanys mınıstriniń orynbasary men departament basshylary, áskerı prokýrorǵa deıin qoldaryn qoıdyryp, ruqsat alǵan. Bári zańdy bolsa da ózin ǵana aıypty ǵyp, sotty qylǵanyn jetkizdi. Qorǵanys mınıstri, mınıstrliktiń zańgeri arasha túspeı, tergeýshilerdiń tálkegine tastap jibergenin de ashyna aıtty.

«Meni ádiletsizdikke tóle almadym. Kinásiz ekenimdi dáleldeımin, ne bolmasa men ólem dedim», – dep eske aldy basyna túsken qıyn-qystaý kezeńdi.

Aıta keteıik, Jandarbek Januzaqov QR QK Áskerı-teńiz kúshteriniń bas qolbasshysy bolyp turǵanda 2020 jyly 6 jylǵa bas bostandyǵynan aıyrylǵan bolatyn. Sot ony konkýrs ótkizbesten kemelerdi baılaý qyzmetterin satyp alǵany úshin kináli dep tapty: birinshi satydaǵy úkimge sáıkes, vıe-admıral óz áreketterimen memleketke 30 mln teńgege jýyq shyǵyn keltirgen. Úkimmen kelispegen Januzaqov 42 kún ashtyq jarııalady. Al 2023 jyly aqpanda Joǵarǵy sot oǵan aqtaý úkimin shyǵardy. Vıe-admıralǵa áskerı sheni, ordenderi qaıtaryldy.