كينوجوبالار بايقاۋى: 128 جوبا ەكىنشى كەزەڭگە جولداما الدى

فوتو: اشىق دەرەككوز

 ۇلتتىق كينو ورتالىعى مەملەكەتتىك قولداۋعا ۇمىتكەر كينوجوبالاردى ىرىكتەۋ كونكۋرسىنىڭ ءبىرىنشى كەزەڭىن قورىتىندىلادى. ساراپتاما كەڭەسىنىڭ وڭ قورىتىندىسىنا يە بولعان 128 ستسەناري مەن ستسەناري جوسپارىكونكۋرستىق ىرىكتەۋدىڭ ەكىنشى كەزەڭىنە ءوتتى. كينوجوبالاردىڭ تىزىمىمەن وسى جەردە تانىسا الاسىز 

«جاۋاپكەرشىلىك ارقالاعان كەڭەس قۇرامىنا ۇزدىك جوبالاردى ىرىكتەۋ وڭاي بولعان جوق. تالاپتار تاسادا قالماي, ستسەناريدىڭ باسىم تاقىرىپتارعا سايكەس كەلۋى, سيۋجەت قۇرىلىمى مەن دراماتۋرگيا پرينتسيپتەرىنە باسا نازار اۋدارىلدى. وسىلايشا, وڭ قورىتىندى العان جوبالار ەكىنشى كەزەڭگە جولداما الىپ وتىر. وزا شىققاندارعا ساتتىلىك تىلەيمىن!

ەندى 18 ءساۋىر-13 مامىر ارالىعىندا كونكۋرستىڭ ەكىنشى كەزەڭى وتەدى. كونكۋرستىق ىرىكتەۋدىڭ ءبىرىنشى كەزەڭىندە وڭ قورىتىندى العان ۇمىتكەرلەر قاجەتتى قۇجاتتاردى ەلەكتروندى فورماتتا تاپسىرۋى ءتيىس. قۇجاتتاردى تاپسىرعاننان كەيىن انىقتالعان قاتەلەردى تۇزەتۋگە 3 كۇن ۋاقىت بەرىلەتىنىن ەسكە سالامىن. بۇل – مادەنيەت جانە اقپارات مينيسترلىگىنىڭ قولداۋىمەن وتكەن جىلى قولدانىسقا ەنگەن جاڭا ەرەجەدەگى وزگەرىستىڭ ءبىرى», – دەپ اتاپ ءوتتى كينو ورتالىعىنىڭ باسقارما توراعاسى قۇرمانبەك جۇماعالي.

ايتا كەتەيىك, كينو ورتالىعى كونكۋرستىق ىرىكتەۋدىڭ ءبىرىنشى كەزەڭى بويىنشا قۇجات قابىلداۋدى 13 ناۋرىزدا اياقتاعان بولاتىن. بيىل انيماتسيالىق, دەرەكتى جانە كوركەم فيلمدەردىڭ ءارتۇرلى سەكتسيالارى بويىنشا ءبىرشاما ءوتىنىم كەلىپ ءتۇستى. ەلەكتروندى تۇردە تىركەلگەن ستسەناريلەر مەن ستسەناري جوسپارلارىنىڭ جالپى سانى – 444. ساراپتاما كەڭەسىنىڭ قاراۋىنا 357 ستسەناري مەن ستسەناري جوسپارى ۇسىنىلدى. ونىڭ ىشىندە كوركەم فيلمدەر بويىنشا 242 ستسەناري, انيماتسيالىق فيلمدەر 32 ستسەناري, دەرەكتى فيلمدەر بويىنشا 83 ستسەناري جوسپارى بار.

سايكەسىنشە, ساراپتاما كەڭەسى جوبالاردىڭ بيىل قاڭتار ايىندا جاريالانعان باسىم تاقىرىپتارعا سايكەستىگىن, كينوجوبانىڭ ستسەناريى نەمەسە ستسەناري جوسپارىنىڭ تۇجىرىمداماسىن, سونىمەن قاتار ستسەناريدىڭ تەحنيكالىق تۇسىن, كەيىپكەرلەردىڭ بەينەسىنىڭ اشىلۋىن ەسكەردى.