كىرپىكتەردى كەسىپ تاستاعان: اقتوبەدە جالدامالى پاتەرىندە بلەفاروپلاستيكا جاساپ, ناۋقاستىڭ كوزىنە زاقىم كەلتىرگەن

اقتوبەدە كليەنتىنىڭ كوزىنە ەكى مارتە بلەفاروپلاستيكالىق وتا جاسايمىن دەپ وعان زارداپ كەلتىرگەن. ول وتانى جالدامالى پاتەرىندە جاساعان دەپ حابارلايدى KYN.KZ اقپارات اگەنتتىگى جوعارعى سوتقا سىلتەمە جاساپ.

ول كليەنتىنە ايىپپۇل رەتىندە 1 ملن 235 مىڭ تەڭگە تولەۋگە ءماجبۇر بولدى.

اقتوبە قالالىق سوتىنا ۇيدە بلەفاروپلاستيكا جاساتقان سوڭ قاباعى جارىلعان ازاماتشا ماتەريالدىق جانە مورالدىق زالال ءوندىرۋ ءۇشىن جۇگىنگەن.

Instagram الەۋمەتتىك جەلىسىندە بلەفاروپلاستيكا قىزمەتى تۋرالى جارنامانى كورگەن تالاپ قويۋشى 2023 جىلدىڭ 4 تامىزىندا جاۋاپكەردىڭ جالدامالى پاتەرىندە وتا جاساتقان.

الايدا ءبىر اپتا وتكەن سوڭ كوزىنىڭ اسسيمەترياسىن بايقاپ, وعان 15 تامىزدا ەكىنشى رەت وتا جاساتادى.

ەكىنشى وتا كەزىندە جاۋاپكەر وڭ كوزدىڭ قاباعانىڭ تەرىسىن تىم تەرەڭ كەسىپ تومەنگى كىرپىكتەردى كەسىپ تاستاعان. ءسويتىپ ودان قان كەتۋى توقتاماعان.

جاۋاپكەر جارانى لازەرمەن كۇيدىرىپ, قاندى توقتاتىپ, قان كەتكەن جەردى تىگىپ تاستاعان.

تالاپ قويۋشى كونيۋنكتيۆيت, اۋىرسىنۋ جانە جاس اعۋ سالدارىنان وفتالمولوگ پەن پلاستيكالىق حيرۋرگتارعا جۇگىنۋگە ءماجبۇر بولعان.

قازىرگى ۋاقىتتا قاباقتىڭ تولىق جابىلماۋىنا, كوزدىڭ جانە قاباقتىڭ ۇنەمى ىسۋىنە بايلانىستى پاتسيەنتتىڭ سىرتقى كەلبەتى وزگەرگەندىكتەن تالاپ قويۋشى جۇمىستى تاستاپ, ءساتسىز جاسالعان وتادان كەيىن ەمدەۋ جانە وڭالتۋ شىعىندارىن كوتەرۋگە ءماجبۇر بولعان.

سوت ءىستى قاراۋ كەزىندە جاۋاپكەردىڭ اۋرۋحانادا فەلدشەر بولىپ جۇمىس ىستەيتىنىن, ونىڭ پلاستيكالىق حيرۋرگيا بويىنشا ليتسەنزياسى جوقتىعىن, تەك سەرتيفيكاتى بار ەكەنىن انىقتادى.

جاۋاپكەر تالاپ قويۋشىعا وتا جاساۋعا جۇمسالعان 80 مىڭ تەڭگەنى ءوز ەركىمەن قايتارعان.

سوت شەشىمىمەن جاۋاپكەردەن تالاپ قويۋشىنىڭ پايداسىنا 235 مىڭ تەڭگە ماتەريالدىق شىعىن جانە 1 ملن تەڭگە مورالدىق زيان ءوندىرىلدى.

سوت شەشىمى زاڭدى كۇشىنە ەندى.